Xərçəngdən vəfat edən Əməkdar artistin qızı - "Deyirdi məni unutmazsan"

47 yaşında xərçəngdən dünyasını dəyişən Əməkdar artist Xanım Qafarovanın qızı Gövhər anası ilə bağlı xatirələrini bölüşüb.

Axşam.az xəbər verir ki, bu barədə o, "ATV Səhər"ə müsahibəsində danışıb.

"Anamla bir yerdə çox ola bilmirdik. O, işləri ilə əlaqədar həmişə çəkilişlərdə, xınayaxdılarda, toylarda olduğuna görə mən nənəm və xalamla birlikdə qalırdım. Onun üzünü axşamdan-axşama görürdüm. Həmişə də gələndə məni sevindirmək üçün bir oyuncaq alıb gətirirdi. Anamı qırıq-qırıq xatirələrlə xatırlayıram. Onu yaşım az olanda itirmişəm. Yaşım ötdükcə də anasızlığın necə ağır şey olduğunu çox yaxşı görürəm.

Anam anasını çox sevib, hörmət edib. Ona görə də istəmişdi ki, ilk övladının adı Gövhər olsun. Elə nənənin də adını mənə qoydular. Adımdan çox məmnunam. Gələcəkdə mən də anamın adını yaşadacağam. İnşallah öz övladıma onun adını qoyacağam. Hər zaman da çalışıram ki, onun adına layiq bir övlad olum" deyə, Gövhər bildirib.

Gövhərin sözlərinə görə, anası daim xəstəliyini ondan gizlədib, lakin o, bunu hiss edib:

"Mənə deyirdi ki, "mən ölməyəcəyəm?" Mən də düşünürdüm ki, niyə bu sualı verə bilər. Deyirdim ki, yox, niyə ölürsən ki?! Deyirdi ki, məni heç vaxt unutmazsan. Deyirdim ki, səni niyə unudum, hara gedirsən ki... O da həmişə hər şeyi gizlədirdi. Amma görürdüm necə ağrıyır".

Qeyd edək ki, X.Qafarova 2014-cü il iyulun 11-də vəfat edib.

Telegramda izləyin