"Xocalı soyqırımını törədənlər vaxtında cəzalandırılsaydılar, iki il öncə Gəncə terroru baş verməzdi" - Deputat

"Gəncə terroru ermənilərin azərbaycanlılara qarşı törətdiyi növbəti soyqırımıdır".

Bunu Sonxeber.az-a danışan deputat Cavanşir Paşazadə deyib.

Deputat qeyd edib ki, oktyabrın 11-də, gecə saatlarında düşmənin silahlı qüvvələri yenidən öz çirkin əməlinə əl ataraq Azərbaycan xalqına qarşı növbəti dəhşətli və insanlıqdan uzaq cinayət törədib:

"10 oktyabrda imzalanmış atəşkəsdən sonra gecə saatlarında Ermənistanın Berd rayonunda yerləşən Erməni Silahlı Qüvvələri Gəncəni Skad ballistik raketlərindən atəşə tutub. Nəticədə 31 mənzil tamamilə dağıdılıb, hadisə yerində və onun yaxınlığındakı obyektlərə və avtomobillərə ciddi ziyan dəyib. Ermənilərin törətdiyi bu terror nəticəsində 10 soydaşımız həlak olub və 40 nəfər yaralanıb. Qurbanlar arasında qadınlar və uşaqlar da olub. Ümumilikdə Vətən müharibəsi dönəmində ermənilər 5 dəfə Gəncəni raket hücumuna məruz qoyublar.

Ermənistan 1980-ci illərin sonlarından Azərbaycana qarşı təcavüzə başlayıb. Təəssüf ki, bu günə kimi davam edən münaqişə boyunca düşmən Azərbaycan xalqına qarşı dəfələrlə soyqırımı, beynəlxalq cinayətlər və terrorlar törədib. Ermənilərin Azərbaycan xalqına qarşı müxtəlif illərdə törətdiyi Xocalı soyqırımı və Gəncə terroru öz ağlasığmaz qəddarlığı və qeyri-insani cəza üsulları ilə bəşər tarixinə həkk olundu. İstər Xocalı, istərsə də Gəncə terroru bütün bəşəriyyətə və insanlığa qarşı yönəlmiş cinayətdir. Lakin hələ də nə Xocalı soyqırımını, nə də Gəncə terrorunu törədənlər öz layiqli cəzalarını almayıblar.

Hesab edirəm ki, Xocalı soyqırımını törədənlər vaxtında cəzalandırılsaydılar, iki il öncə Gəncə terroru baş verməzdi. Azərbaycan hökuməti xarici ölkələrdə davamlı olaraq bu cinayətlər barədə təbliğatlar aparıb, dünyanı məlumatlandırsa da, yenə də beynəlxalq təşkilatlar və demokratiyadan, insan haqlarından dəm vuran ölkələr bu bəşəri cinayətləri görməzdən gəlməkdədir".

Deputat qeyd edib ki, Ermənistanın törətdiyi əməllərinin cavabını alması üçün biz işimizi davam etdirməliyik:

"Hazırda Azərbaycan döyüş meydanındakı üstünlüyünü danışıqlar masasında da davam etdirir. Belə ki, Azərbaycan son illərdə həyata keçirdiyi uzaqgörən və məqsədyönlü siyasət nəticəsində dünyanın aparıcı və nüfuzlu dövlətlərindən birinə çevrilib. Cənubi Qafqazın lider dövləti olan Azərbaycan regionda balanslaşdırılmış siyasət aparmaqla Avropanın siyasi həyatında da mövqeyi olan ölkələr sırasındadır. Cari ilin 6 oktyabr tarixində Partiyamızın Sədri, Prezident İlham Əliyevin Praqada "Avropa siyasi birliyi" Zirvə Toplantısında iştirak etməsi qeyd olunanların əyani göstəricisidir. Əminəm ki, tezliklə Ermənistan sülh müqaviləsini imzalamağa məcbur olacaq və Azərbaycan vətəndaşlarına qarşı törədilən hər bir cinayətlərə görə səbəbkarlar öz cəzasını alacaq".

Aysel Yusifqızı

Telegramda izləyin