"Azərbaycan əhalisi niyə Ermənistanın bütün ərazisini dolaşa-dolaşa Naxçıvana getməlidir?"

Ermənistanın Baş naziri Nikol Paşinyan Ermənistan - Azərbaycan sərhədində 3 keçid məntəqəsinin açılması ilə bağlı layihəyə Azərbaycan müsbət cavab gözlədiyini deyib.

Politoloq Qabil Hüseynli Sonxeber.az-a bildirib ki, dəmiryol və şose xətti Sovet dövründə mövcud olub və 60 ilə yaxın fəaliyyət göstərib. Azərbaycan həmin layihənin yenidən bərpa olunmasını təkid edir və bundan başqa təklifi qəbul etmir:

"Azərbaycan tərəfi bu təklifi rədd edib. Azərbaycan əhalisi niyə Qazaxdan keçib Ermənistanın bütün ərazisini dolaşa-dolaşa Naxçıvana getməlidir? Ən əlverişli gediş xətti dəmiryol və şose xəttinin yanaşı olmasıdır. Dəmiryol və şose xətti Sovet dövründə mövcud olub və 60 ilə yaxın fəaliyyət göstərib. Zəngilanın Mincivan stansiyasından Naxçıvanın Culfa şəhərinə qədər olan yoldur. Yolun bir istiqaməti İrana, digər istiqaməti Naxçıvan şəhərinə, ordan da İrəvana gedib. Yəni bu həm iki respublikanın paytaxtlarını, həm də Naxçıvanla Azərbaycanı birləşdirən proyektləşdirilmiş layihədir.Azərbaycan həmin layihənin yenidən bərpa olunmasını təkid edir və bundan başqa təklifi qəbul etmir. Tutaq ki, Laçından Ermənistana buraxılış məntəqəsi var, yaxın rayonlar üçün də ola bilər. Qazaxdan İcəvana qədər dəmiryolu var, o dəmiryolunu uzatmaq barədə razılaşma ola bilər və ya Ermənistanın Gümrü şəhərindən Türkiyənin Qars şəhərinə qədər dəmiryolunu uzatmaq olar. Amma bunlar hamısı Naxçıvana dəmiryolu və şose yolunun açılmasından sonra baş verə bilər. Azərbaycan bunun üzərində israr edir . 2020-ci ilin 10 noyabrında imzalanmış üçtərəfli sənəddə də öz əksini tapıb".

Şəbnəm Lətifi

Telegramda izləyin