Otellərə girərkən "zaks" tələb olunmalıdır ? - ARAŞDIRMA

Xəbər verdiyimiz kimi, Bakıda 16 yaşlı qız zorlanıb. Hadisədən sonra 2006-cı il təvəllüdlü R.M Nərimanov rayon Polis İdarəsinin 17-ci polis şöbəsinə ərizə ilə müraciət edərək, rayon ərazisində yerləşən otellərin birində oğlan tanışı tərəfindən zorlandığını bildirib. Daxil olan şikayət əsasında rayon Polis İdarəsi tərəfindən araşdırmalara başlanıb.

Bəs bu kimi hallara görə kim məsuliyyət daşıyır ?

Mövzu ilə bağlı Azərbaycan Hotellər Assosiasiyası ilə əlaqə saxladıq.

Assosiyasiyadan bildirildi ki, otelə giriş şəxsiyyəti təsdiq edən sənədlə olmalıdır. Hər kəs otelə daxil olarkən qeydiyyatdan keçməlidir. Hər hansı bir hadisə baş verərsə, vətəndaşın şəxsiyyəti bəlli olmalıdır. Bu hər bir otel üçün zəruri qaydadır. Nigah şəhadətnaməsinin tələb olunması bağlı isə hər hansı məhdudiyyət yoxdur. Otelə hər yaşda insan daxil ola bilər.

Məsələ ilə bağlı Milli Məclisin deputatı Musa Quliyev bildirib ki, turizm haqqında qanuna əsasən, otellərə giriş-çıxış sərbəstdir.

"Biz hüquqi dövlətdə yaşayırıq, digər dövlətlərdə belə qanunlar yoxdur. Əgər nigah şəhadətnaməsi və digər şərtlər tələb olunarsa, turizm sektorunun inkişafına zərər gələcək. Xarici ölkələrdən gələn turist sayı azalacaq. Ölkənin demokratiya imicinə də mənfi təsir göstərəcək. Həmin cinayətlərin statistikasına baxsaq, bizdə digər ölkələrə nisbətən elə də yüksək deyil. Oteldə müəyyən məsələlər var ki, bunu otelin öz daxili qaydaları ilə tənzimləmək olar. 18 yaşına çatmayan insanlardan müəyyən sənəd tələb oluna bilər. Qanunvericilikdə otellərlə bağlı hər hansı məhdudiyyətin qoyulması gözlənilmir".
AYSEL QULİYEVA

Telegramda izləyin