Qarabağda yenidən antiterror əməliyyatı başlaya bilərmi? - Deputatdan AÇIQLAMA

Noyabrın 22-də, 09:17-dən 14:48-dək Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən Azərbaycan Ordusunun Füzuli, Şuşa, Xocavənd, Tərtər və Xocalı rayonları istiqamətlərində, eləcə də saat 10:35-dən 14:30-dək Ermənistan silahlı qüvvələrinin bölmələri Basarkeçər rayonunun Əzizli yaşayış məntəqəsi istiqamətində yerləşən mövqelərindən ordumuzun Kəlbəcər rayonunun Yuxarı Ayrım yaşayış məntəqəsi istiqamətində yerləşən mövqelərini müxtəlif çaplı atıcı silahlardan fasilələrlə atəşə tutub. Təxribatlar davam edərsə, Qarabağda antiterror əməliyyatı başlaya bilərmi?

Bununla bağlı Sonxeber.az-a danışan deputat Cavanşir Paşazadə bildirib ki, bütün bu təxribatlar Qarabağda qanunsuz erməni silahlı birləşmələrinin mövcud olduğunu göstərir:

"Rusiya sülhməramlılarının olduğu ərazilərdə bu günə qədər qanunsuz erməni silahlı qüvvələrinin qalması 10 noyabr bəyannaməsinə ziddir. Görünür, erməni terrorçuları 44 günlük Vətən müharibəsindəki biabırçı məğlubiyyətlərindən dərs çıxarmayıblar. Unudurlar ki, "Dəmir yumruq" hələ yerindədir və istənilən vaxt onların belini qırmaq gücünə malikdir.

Bu gün Qarabağdakı erməni terrorçularını maliyyələşdirən qüvvələr regiondakı sülhü pozmağa çalışırlar. Amma nə erməni terrorçuları, nə də onların havadarları istəklərinə nail ola bilməyəcəklər".

Deputat vurğulayıb ki, ermənilər bu təxribatları sonda onların bir ölkə kimi xəritədən silinməsinə səbəb olacaq:

"Müxtəlif təxribatlarla güc şousu göstərən erməni terrorçuları sülh müqaviləsinin imzalanmasıma mane olmağa çalışırlar. Amma əvvəl-axır Ermənistan Azərbaycanın şərtləri əsasında hazırlanan sülh müqaviləsini imzalamalı olacaq.

Qaldı ki, yenidən antiterror əməliyyatlarının başlanmasına, hazırda terrorçuların bütün təxribatlarının qarşısı Müzəffər Azərbaycan Ordusu tərəfindən qətiyyətlə alınır. Bundan sonra da alınacaq. Əlbəttə, hər hansı addımların atılması qərarı Ali Baş Komandan tərəfindən verilir. O, nəyi, necə, nə zaman edəcəyini yaxşı bilir".

Aysel Yusifqızı

Telegramda izləyin