"Daha 3 il sülhməramlıların getməsini gözləyə bilmərik" - Bəhruz Məhərrəmov

"Hazırda sülhməramlıların müvəqqəti nəzarətində olan ərazilər Azərbaycanın beynəlxalq hüquqla tanınan ayrılmaz tərkib hissəsidir. Bu baxımdan bir an öncə həmin ərazilərdə Azərbaycanın yurisdiksiyası, dövlət hakimiyyət orqanlarının fəaliyyəti 29 il sonra nəhayət ki, bərpa olunmalıdır".

Bu sözləri Milli Məclisin deputatı Bəhruz Məhərrəmov Sonxeber.az-a bildirib.

O həmçinin qeyd edib ki, artıq bölgədəki erməni vətəndaşlarımızla ilkin təmaslarımız var, hazırda isə bu təmaslar daha da artmalı, xüsusən vətəndaş cəmiyyəti nümayəndələrinin fəaliyyəti güclənməlidir:
"Hazırda sülhməramlıların müvəqqəti nəzarətində olan ərazilər Azərbaycanın beynəlxalq hüquqla tanınan ayrılmaz tərkib hissəsidir. Bu baxımdan bir an öncə həmin ərazilərdə Azərbaycanın yurisdiksiyası, dövlət hakimiyyət orqanlarının fəaliyyəti 29 il sonra nəhayət ki, bərpa olunmalıdır.
Bunun üçün ilk növbədə ən qısa zamanda Ermənistandan Azərbaycanın Xankəndi şəhərinə gələn yol Laçın dəhlizinə sülhməramlılarla birgə nəzarəti həyata keçirməli, habelə Ermənistanla şərti sərhəddə sərhəd və gömrük keçid məntəqələrinin tam fəaliyyəti təmin edilməlidir. Digər tərəfdən, separatçı rejimin əsirinə çevrilmiş Qarabağ iqtisadi rayonunun erməni sakinləri ilə təmaslar qurulması vacibdir. Bildiyiniz kimi, artıq bölgədəki erməni vətəndaşlarımızla ilkin təmaslarımız var, hazırda isə bu təmaslar daha da artmalı, xüsusən vətəndaş cəmiyyəti nümayəndələrinin fəaliyyəti güclənməlidir. Sülhməramlıların da qarşısında əsas vəzifələrdən biri ən qısa müddətdə bu prosesin təhlükəsiz, sülhün qorunması şərti ilə realizəsidir. Amma təəssüf ki, biz sülhməramlıların nəinki bu prosesə dəstək vermədiyini, əksinə prosesi ləngitdiyi, təmaslara mane olduğunu görürük. Amma 10 noyabr bəyanatına əsasən, Rusiya sülhməramlılarının bölgədə qalma müddəti zatən bəllidir. Lakin təbii ki, biz həmin ərazilərimizdə Bakının iradəsinin təmini üçün daha 3 il, yəni sülhməramlıların getməsini gözləyə bilmərik. Biz sülhməramlılarla, yaxud sülhməramlısız Xankəndi və bütün ətraf ərazilərdə tezliklə nəzarəti tam bərpa edərək dövlət hakimiyyət orqanlarının tam fəaliyyətinə nail olacağıq".

Şəbnəm Lətifi

Telegramda izləyin