"2023-cü ildə Ulu Öndərin zəngin fəaliyyətini gənc nəsillərə daha dolğun şəkildə çatdırmaq imkanı yaranacaq" - Cavanşir Paşazadə

"2023-cü ilin "Heydər Əliyev İli" elan edilməsi onun xalq qarşısında misilsiz xidmətlərinə verilən yüksək dəyərdir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, cənab Prezident İlham Əliyevin müvafiq sərəncamı ilə 2023-cü il "Heydər Əliyev İli" elan olunub:

"2023-cü ildə ulu öndər Heydər Əliyevin 100 illiyi tamam olur. Ümummilli liderin anadan olmasının 100 illiyi bu il xalqımız tərəfindən yüksək səviyyədə qeyd ediləcək. 2023-cü ildə müəyyən olunacaq tədbirlər planına əsasən xalqımız ulu öndər Azərbaycan dövləti mövzularında silsilə tədbirlər təşkil ediləcəkdir. 2023-cü ildə Ulu Öndərin zəngin fəaliyyətini və çoxşaxəli irsini "Heydər Əliyev İli" çərçivəsində gənc nəsillərə daha dolğun şəkildə çatdırmaq imkanı yaranacaqdır".

Deputat söyləyib ki, ulu öndər Heydər Əliyev ömrünü xalqına və dövlətinə həsr edən dahi şəxsiyyətdir:

"Ümumilli liderin həyatı Azərbaycanın tarixi ilə bağlıdır. Azərbaycan xalqı Ulu Öndər Heydər Əliyevin yüksək səviyyəli idarəçiliyinin və liderliyinin şahidi olub. Bugünkü Azərbaycanın rifahı Ulu Öndərin adı ilə bağlıdır. Bilirsiniz ki, 90-cı illərin əvvəlləri xalqımız üçün ən ağır dövr idi. Həmin dövrdə ulu öndər Heydər Əliyev həyatını təhlükəyə ataraq ölkəyə geri qayıtdı və ölkəmizi yenidən müstəmləkə altına düşməkdən xilas etdi. Heydər Əliyev Azərbaycana rəhbərlik etdiyi hər bir dövr nə qədər ağır olsa da ölkəni tərəqqiyə və inkişafa aparıb.

Deputat vurğulayıb ki, ulu öndərin ən böyük arzusu torpaqlarımızın işğaldan azad olunması və qaçqın köçkünlərin öz yurdlarına qayıtması olub:

"Ümumilli liderin bu arzusunu onun layiqli davamçısı cənab prezident İlham Əliyev reallaşdırdı. Cənab prezident İlham Əliyev atasının siyasi kursunu uğurla davam etdirərək ölkəmizi güclü və qüdrətli ölkələr sırasına daxil edib. Ən önəmlisi isə ulu öndərin ən böyük arzusunu reallaşdıraraq Qarabağı öz sahibinə geri qaytardı. Bu gün soydaşlarımız illərdir həsrətində olduğu doğma yurdlarına geri qayıdırlar. Əminəm ki, ulu öndər Heydər Əliyev sağ olsaydı cənab prezidentlə qürur duyardı".

Aysel Yusifqızı

Telegramda izləyin