Çində kimya fabrikində partlayış nəticəsində 2 nəfər ölüb

Ötən gecə Çinin şimal-şərqindəki Liaonin əyalətindəki Panşan şəhərində sənaye kimyəvi maddələri istehsal edən fabrikdə baş verən partlayış nəticəsində iki nəfər ölüb.

Sonxeber.az xəbər verir ki, partlayışdan sonra başlayan yanğın yerli yanğınsöndürənlərin müdaxiləsi ilə söndürülüb.

Partlayış və ondan sonra baş verən yanğında 2 nəfər həyatını itirib, 34 nəfər yaralanıb. İtkin düşmüş 12 nəfərin axtarışları davam edir.

Yanğın fabrik ətrafındakı digər obyektlərə və yaşayış məntəqələrinə keçmədən nəzarət altına alınsa da, hadisə ilə bağlı araşdırmalar davam edir.

Çində infrastrukturun köhnəlməsi və ya əməyin mühafizəsi tədbirlərinin qeyri-kafi olması səbəbindən qəzalar baş verir.

Şimaldakı Tienjin şəhərində 2015-ci ildə liman ərazisində kimyəvi maddələrin saxlandığı anbarlarda baş verən partlayışda 173 nəfər həlak olub.

2019-cu ildə Jiangsu əyalətinin Yançing şəhərində kimya fabrikində baş verən partlayışda 78 nəfər həlak olmuş, fabrikin ətrafındakı evlərə ciddi ziyan dəyib.

2022-ci ilin iyun ayında Sinopec neft-kimya şirkətinin Şanxaydakı fabrikində baş verən yanğında bir nəfər ölüb.

22 noyabr 2022-ci ildə Hnan əyalətində sənaye kimyəvi maddələri istehsal edən fabrikdə baş verən yanğında ən azı 36 nəfər ölüb.

Şəbnəm Lətifi

Telegramda izləyin