"Bu gün bəzi təşkilatlar qəbul etdikləri qətnamələrlə Azərbaycan-Ermənistan münasibətlərini yenidən gərginləşdirməyə çalışırlar"- Deputat

"44 günlük Vətən müharibəsində əldə etdiyimiz möhtəşəm zəfər bir çox ölkələrin və təşkilatların əsl simasını açıb göstərdi".

Bunu Sonxeber.az-a danışan deputat Cəbi Quliyev deyib.

Deputat qeyd edib ki, bu gün bəzi dövlətlər və təşkilatlar sülh müqaviləsinin imzalanmaması üçün əllərindən gələni edirlər:

"Bizim günü-gündən artan nüfuzumuzu və gücümüzü həzm edə bilməyən bəzi qərəzli qüvvələr "insan hüquqları" pərdəsi arxasında ölkəmizə qarşı təzyiq göstərməyə çalışırlar. 44 günlük Vətən müharibəsində və ondan sonrakı dövrdə dəfələrlə bizə qarşı ikili münasibətin şahidi olmuşuq.

Yanvarın 19-da Avropa Parlamentinin qəbul olunmuş, həqiqətdən uzaq, böhtan xarakterli məsələlərin yer aldığı qətnamə bizə qarşı oynanılan oyunların davamıdır. Belə ki, Avropa İttifaqı (Aİ) Şurasının Ermənistanda monitorinq missiyasının yaradılması post-müharibə dövründə regionda vəziyyəti gərginləşdirməyə hesablanmış növbəti addımdır. Məqsəd ikitərəfli əsasda həyata keçirilməli olan sərhədlərin delimitasiyası prosesi də daxil olmaqla, Azərbaycan və Ermənistan arasında normallaşma prosesinə xələl gətirməkdir. Bu gün demokratiyadan dəm vuran bəzi təşkilatlar 30 il ərzində Azərbaycan torpaqlarını zəbt edən, insanlarımızı vəhşicəsinə qətlə yetirən, müxtəlif soyqırımlar törədən Ermənistana qarşı niyə bir dəfə də olsa bu cür qətnamələr qəbul etmədi. Budurmu onların demokratiya anlayışı?!"

Deputat vurğulayıb ki, Ermənistan və onun havadarlarının bugünkü məqsədi Qarabağdakı ekoloji terrorunu və oradakı silahlı birləşmələrin təxribatlarını davam etdirməkdir:

"Onlar bu yolla göstərməyə çalışırlar ki, guya Qarabağ münaqişəsi davam edir. Azərbaycan 44 günlük Vətən müharibəsində əldə etdiyi qələbə ilə həm Qarabağ münaqişəsinə, həm də işğala öz gücü ilə son qoydu. Tezliklə də Ermənistan sülh müqaviləsini imzalayacaq. Əks təqdirdə, Ermənistan növbəti dəfə Azərbaycanın "dəmir yumruğ"unu öz başında hiss edəcək".

Aysel Yusifqızı

Telegramda izləyin

instagramda izləyin