"Ötən dövrdə ombudsman dövlət qurumları və vətəndaş cəmiyyəti institutları əməkdaşlıqda əhəmiyyətli irəliləyişlər əldə edib" - DEPUTAT

"Azərbaycan Respublikasının İnsan Hüquqları üzrə Müvəkkili (Ombudsman) öz mandatına uyğun olaraq insan hüquq və azadlıqları sahəsində öz səmərəli fəaliyyətini davam etdirməkdədir. Ötən il ərzində insan hüquq və azadlıqlarının qorunması, sosial ədalət prinsiplərinin təmin edilməsi sahəsində müasir çağırışlara və beynəlxalq meyarlara uyğun olaraq fəaliyyətini daha da inkişaf etdirib".

Bunu Sonxeber.az-a danışan deputat Aydın Hüseynov bildirib.

Deputat qeyd edib ki, ombudsmanın ilk növbədə, Ermənistan tərəfindən hüquqları pozulan Azərbaycan vətəndaşlarının mənafeyinin beynəlxalq miqyasda müdafiəsi, eyni zamanda dövlətimizin milli maraqlarının təmin edilməsi, həmçinin Ermənistandan deportasiya olunan və qaçqın düşən azərbaycanlıların hüquqlarının bərpası istiqamətində gördüyü ardıcıl tədbirləri xüsusi qeyd etmək lazımdır:

"İndiyə qədər Ermənistanın Azərbaycana qarşı törətdiyi müharibə və terror cinayətləri, eləcə də ekoloji cinayətlərlə bağlı beynəlxalq insan hüquqları təşkilatlarına ünvanlanmış müraciətlər də təsdiq edir ki, Ombudsman üçün başlıca prinsiplərdən olan Azərbaycan dövlətinin milli maraqları strateji fəaliyyət hədəfi kimi xüsusi diqqətdə saxlanılır. Eyni zamanda, bu qurum Ermənistanın dünya ictimaiyyətini çaşdırmaqla Azərbaycana qarşı yanlış fikir formalaşdırmaq məqsədi daşıyan qərəzli açıqlamalarının, saxta informasiya təşviqatının qarşısını alınmasında və ifşa olunmasında da prinsipiallıq nümayiş etdirməkdədir.

Ombudsmanın təşəbbüsü və təşkilatçılığı ilə ölkəmizdə təşkil edilmiş beynəlxalq əhəmiyyətli tədbirlərlə yanaşı, beynəlxalq tədbirlərdə iştirak etməklə insan hüquq və azadlıqlarının müdafiəsi sahəsində müsbət təcrübə mübadiləsi, keçmiş qaçqın və məcburi köçkün soydaşlarımızın hüquqlarının müdafiəsi, habelə Azərbaycan həqiqətlərinin təbliği və dünya ictimaiyyətinə çatdırılması baxımından tədbirləri də əhəmiyyətli hesab etmək olar".

Deputat vurğulayıb ki, Avropa İttifaqı, Avropa Şurası, ATƏT, İslam Əməkdaşlıq Təşkilatı, Beynəlxalq Qırmızı Xaç Komitəsi. Beynəlxalq və Avropa Ombudsmanlar institutları və digər təşkilatlarla sıx əməkdaşlıq Azərbaycan Ombudsmanının nüfuzunun artmasında mühüm rol oynayıb:

"Ötən dövrdə Ombudsman dövlət qurumları, vətəndaş cəmiyyəti institutları, beynəlxalq təşkilatlar və xarici həmkarlarla əməkdaşlıqda əhəmiyyətli irəliləyişlər əldə edib. Paytaxtda və bölgələrdə insan hüquqlarının təmini vəziyyətinin monitorinqin aparılması, aşkar edilmiş problemlərin yaranma səbəblərinin təhlil edilərək onların həlli istiqamətində aidiyyəti qurumlara təklif və tövsiyələrin verilməsi, nöqsan və çətinliklərin aradan qaldırılması və pozulmuş hüquqların bərpasına nail olunması Ombudsmanın fəaliyyətinin cəmiyyət həyatının bütün sahələrini əhatə etməsini göstərir.

Eləcə də qadın hüquqlarının müdafiəsi və gender əsaslı zorakılıqla mübarizə sahəsində Müvəkkilin gördüyü işlər öz mühüm səmərəsini veribdir. Ombudsmanın humanizm prinsiplərinə söykənərək vəsatəti sayəsində məhkumların azad olunması da vətəndaş mənafelərinə xüsusi diqqətin nümunəsidir. Məhkumların və onların ailə üzvlərinin əfv haqqında müraciətlərini nəzərə alaraq, müntəzəm şəkildə Azərbaycan Respublikasının Prezidenti yanında Əfv Məsələləri Komissiyasına müraciətlər edən Ombudsmanın bu humanizmi sayəsində yüzlərlə məhkum cəzasını cəkməkdən azad edilib, yüzlərlə məhkumun cəzası yarıyadək azaldılıb. Eləcə də şəxsən Səbinə xanım Əliyevanın birbaşa cəzaçəkmə müəssisələrinə, istintaq təcridxanalarına və internat tipli təhsil müəssisələrinə baş çəkərək məhkumların sağlamlığı, saxlanma vəziyyəti ilə yerindəcə tanış olması təqdiredilməlidir.

Ombudsmanın insan hüquq və azadlıqlarının qorunması ilə bağlı cəmiyyətdə geniş hüquqi maarifləndirmə və təşviqat tədbirləri də ötən il əhəmiyyətli olub və bu hər bir vətəndaşın hüquqlarına xüsusi diqqətin bariz nümunəsi sayıla bilər.
Çıxışımın sonunda Müvəkkilin 2022-ci ildəki fəaliyyətini səmərəli və ölkəmizin milli maraq və mənafelərinin qorunması, vətəndaş hüquqlarının etibarlı müdafiəsi baxımından müsbət qiymətləndirdiyimi diqqətə çatdırmaq istərdim. İnanıram ki, Ombudsman qarşıdakı dövrdə də fəaliyyətini bu ali prinsiplər üzərində davam etdirərəcəkdir".

Aysel Yusifqızı

Telegramda izləyin