Azərbaycan-Almaniya arasındakı hər gün daha da inkişaf edən əlaqələr hər iki dövləti və xalqı bir-birinə daha da yaxınlaşdırır" - DEPUTAT

"Prezident İlham Əliyevin Almaniyaya işgüzar səfəri siyasi, iqtisadi, mədəni əlaqələrin inkişafı baxımından kifayət qədər məhsuldar oldu".

Bunu Sonxeber.az-a danışan deputat Nəsib Məhəməliyev bildirib.

Deputat qeyd edib ki, Almaniya dünyanın ən inkişaf etmiş, Ümumi Daxili Məhsulun həcminə görə dünya iqtisadiyyatının strukturunda əhəmiyyətli rola malikdir:

"Cənab prezidentin Valter Ştanmayerlə və Baş nazir Şoltsla görüşləri dövlətlərarası münasibətlərin yüksək səviyyədə olmasının göstəricisidir və Avropa İttifaqı ilə əməkdaşlıqda siyasi baxışlarımız üst-üstə düşür. Prezidentin 30-dan çox Almaniya şirkətlərinin nümayəndələri keçirdiyi görüş, ölkələrimiz arasında iqtisadi əməkdaşlığın daha da inkişaf etdirilməsini, üst mərhələyə qaldırılmasını şərtləndirir".

Deputat vurğulayıb ki, Alman şirkətlərinin malik olduğu ən müasir texnologiyaların ölkəmizə gətirilməsi gətirilməsi, ayrı-ayrı sahələrə sərmayə qoyulması, şübhəsiz Azərbaycan iqtisadiyyatının güclənməsinə, yeni iş yerlərinin açılmasına səbəb olacaqdır:

"Sənayedə, kənd təsərrüfatında alman texnologiyalarından istifadə olunması, Azərbaycan iqtisadiyyatının rəqabətə davamlılığını artıracaqdır. Müasir dünyanın qlobal çağırışlarına uyğun olaraq, yaşıl enerjinin istehsalı, onun Avropaya ixracı, rəqəmsallaşma, nəqliyyat-logistika məsələlərinin həlli məsələləri müzakirə predmeti olmuşdur. Mədəni əlaqələr inkişaf edəcək, kadr hazırlığına xüsusi diqqət yetiriləcəkdir. Azərbaycan-Almaniya arasındakı günü gündən inkişaf edən əlaqələr hər iki dövləti və xalqı bir-birinə daha da yaxınlaşdırır".

Aysel Yusifqızı

Telegramda izləyin