Gədəbəy RİH Novruz bayramı şənliyi təşkil etdi - FOTO-VİDEO

Artıq Novruz bayramına sayılı günlər qalıb. Bu münasibətlə ölkəmizin müxtəlif bölgələrində bayram tədbirləri təşkil olunur.

Sonxeber.az xəbər verir ki, daha bir tədbir Gədəbəy Rayon İcra Hakimiyətinin təşkilatçılığı ilə Heydər Əliyev Parkında keçirilib.

Tədbirdə milli adət-ənənələrimizi özündə ehtiva edən sərgi nümayiş etdirilib. Bir tərəfdə nehrə çalxalanıb, bir tərəfdə sac üstə fəsəli yuxa və Gədəbəy qutabı bişirilib. Ətraf bayramsayağı Novruz atributları ilə bəzədilib: səmənilər, xonçalar, xalq yaradıcılığı nümunələri sərgilənib. Şənlikdə baharın rəmzi olan tonqal da alovlandırılıb.

Rayon İcra Hakimiyyətinin başçısı Orxan Mürsəlov Novruz bayramı münasibətilə rayon sakinlərini səmimi qəlbdən təbrik edərək xoş arzularını dilə gətirib.

O, Novruz bayramının xalqımızın tarixi, milli-mənəvi dəyərlərində böyük yer tutmasından və Azərbaycan tarixini yazan bir şəxsiyyət kimi Ümummilli liderin milli-mənəvi dəyərlərimizə verdiyi önəmdən danışıb.

Qeyd olunub ki, məhz Ulu öndər Heydər Əliyevin hakimiyyəti dövründə bu bayram dövlət səviyyəsində yüksək əhval-ruhiyyədə qeyd edilməklə yanaşı, dünya azərbaycanlılarının milli bayramına çevrilib. Novruz bayramını milli birlik bayramı adlandıran dahi lider öz arzularını belə ifadə etmişdi: "Gün o gün olacaq ki, Novruz bayramını bir dəfə Şuşada, o biri ili Laçında, o biri ili Kəlbəcərdə, Ağdamda, Füzulidə, Cəbrayılda, Zəngilanda, Qubadlıda, keçirəcəyik. Əminəm ki, belə də olacaqdır. Mən buna inanıram və bu inamla yaşayıram, bu inamla işləyirəm və bu inamlada Azərbaycan xalqına rəhbərlik edirəm." Cənab Prezident, Müzəffər Ali Baş Komandan İlham Əliyev tərəfindən doğma Qarabağımızda, Şuşanın Cıdır düzündə 28 illik həsrətdən sonra bayram tonqalının yandırılması Ulu öndərin arzularının təntənəsi idi.

Daha sonra incəsənət xadimləri çıxış ediblər, milli rəqslərimiz ifa edilib, kompozisiyalar təqdim olunub, həmçinin Gədəbəy aşıqları ifaları ilə şənliyə xüsusi ab-hava qatıblar.

Sözügedən təntənəli tədbirdən foto və videoları təqdim edirik:

Telegramda izləyin