"Laçın yolunda qurulan sərhəd-buraxılış məntəqəsi Qarabağda erməni terrorçularının sayının atmasının qarşısını alacaq" - DEPUTAT

"İrəvandakı Azadlıq Meydanında məşəl yürüşü zamanı Azərbaycan və Türkiyə bayraqlarının əvvəlcədən planlaşdırılmış və təşkil olunmuş şəkildə yandırılması növbəti erməni barbarlığıdır".

Bunu Sonxeber.az-a danışan deputat İqbal Məmmədov bildirib.

Deputat qeyd edib ki, ağır atletika üzrə Avropa çempionatından sonra İrəvandakı Azadlıq Meydanında məşəl yürüşü zamanı bayrağımızın yandırılması ermənilərin necə vəhşi və terrorçu millət olduğunun sübutudur:

"Bilirsiniz ki, aprelin 23-ü Azərbaycan Respublikası Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsi quruldu. Laçında sərhəd−nəzarət məntəqəsi qurulmasında əsas məqsəd 2020-ci il 10 noyabr tarixli üçtərəfli Bəyanata zidd olaraq Ermənistandan Azərbaycan ərazisindəki qeyri-qanuni erməni silahlı dəstələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasının qarşısının alınmasıdır. İki ildən çoxdur ki, Azərbaycan Ermənistanın və Rusiya sülhməramlı qüvvələrin üzərlərinə götürdüyü öhdəlikləri icra etməsini gözlədi. Rusiya sülhməramlıları Qarabağdakı terrorçuları çıxarmaq əvəzinə, oradakı silahlı erməni dəstələrinin sayının artmasına və onların rahat şəkildə silahlandırılmasına şərait yaratdılar. Nəticədə də Azərbaycan Laçın-Xankəndi yolunun üzərində öz sərhəd−nəzarət məntəqəsini qurmaq qərarını aldı".

Deputat vurğulayıb ki, Ermənistan birtərəfli qaydada Laçın-Xankəndi yolunun üzərində post qurduğundan Azərbaycan da adekvat addım atmalı idi:

"İki ildən çoxdur ki, 10 noyabr 2020-ci il Üçtərəfli bəyanatının müddəalarına zidd olaraq, Ermənistan və qanunsuz erməni hərbi birləşmələri yoldan hərbi məqsədlər, o cümlədən minaların daşınması üçün istifadə edirdilər. Ermənilər Azərbaycanın ərazilərindən talan etdikləri təbii sərvətləri də bu yolla daşınırdı. Ermənistan tərəfinin təxribatları və soyğunçuluq əməlləri Azərbaycanın Laçında öz sərhəd−nəzarət məntəqəsini qurmasını qaçılmaz etdi. Düşünürəm ki, Laçın-Xankəndi yolunun başlanğıcında qurulan sərhəd-buraxılış məntəqəsi Qarabağda erməni terrorçularının sayının atmasına maneə olmaqla yanaşı, həm də Azərbaycan sərvətlərinin talan olmasının qarşısını alacaq".

Aysel Yusifqızı

Telegramda izləyin