İsrail qüvvələri işğal altındakı İordan çayının qərb sahilində gənc fələstinli qadını öldürüb

İsrail əsgərləri işğal altındakı İordan çayının qərb sahilindəki Huvvara qəsəbəsində bıçaqlı hücum iddiası ilə bir fələstinli qadını öldürüb.
Sonxeber.az xəbər verir ki, Fələstin Səhiyyə Nazirliyindən verilən yazılı açıqlamada İordan çayının qərb sahilinin şimalındakı Nablus şəhərinin Huvvara qəsəbəsində 26 yaşlı İman Odehin İsrail əsgərləri tərəfindən sinəsindən güllə yarası aldığı və ağır yaralandığı bildirilib.

Nablusdakı Rəfidiyə Dövlət Xəstəxanasına aparılan gənc qadının xəstəxanada dünyasını dəyişdiyi qeyd edilib.

İsrail ordusundan verilən yazılı açıqlamada Huvvarada baş verən hadisədə 20 yaşlı yəhudi köçkünün bıçaqla hücuma məruz qaldığı iddia edilib.

Bildirilib ki, kişi sakin yüngül xəsarət alıb, hücumda şübhəli bilinən şəxs isə "zərərsizləşdirilib".

İsrail ordusu son zamanlar işğal altındakı İordan çayının qərb sahilinin müxtəlif bölgələrində reydlərini və saxlama əməliyyatlarını artırıb.

Basqınlara etiraz edən fələstinlilərə tez-tez real güllələrlə yanaşı rezin güllələrlə də müdaxilə edən İsrail qüvvələri ilin əvvəlindən bu yana 20-si uşaq, 2-si qadın olmaqla 108 fələstinlini şəhid edib.

Digər tərəfdən, İordan çayının qərb sahilindəki, xüsusilə Nablus və Huvvara və Burin kimi ətraf bölgələrdəki fələstinlilər, ətrafdakı qeyri-qanuni məskunlaşmalarda yaşayan fanatik yəhudi köçkünlərin tez-tez hədəfinə çevrilirlər.

Telegramda izləyin