9 May - faşizm üzərində Qələbə günüdür

"Dünya birliyi Azərbaycan xalqının döyüş ruhu, insan resursu və təbii ehtiyatlarının müstəsna rolu hesabına İkinci Dünya Müharibəsində faşizm üzərində böyük qələbə qazansa da, təəssüf ki, bu qorxunc ideologiya tam məhv edilmədi. Üstəlik XX əsrin sonlarında faşizm ideologiyası Ermənistanın simasında yenidən dirçəlməyə, zamanında özü faşizmdən zərər çəkmiş Fransa kimi bəzi dövlətlər isə erməni neofaşizminə açıq dəstək verməyə başladılar. Azərbaycan 44 günlük haqq savaşında Prezident İlham Əliyevin Müzəffər Ali Baş Komandanlığı ilə Ermənistanı diz çökdürməklə, əslində erməni faşizminin yayılmasının qarşısını alıb, Qafqazda neofaşizmin əsas dalğasını məhv etdi. Cənab İlham Əliyevin dediyi kimi, bununla da Azərbaycan xalqı və Azərbaycan Ordusu bölgəmizi böyük bəladan – erməni faşizmindən xilas etmiş oldu".

Bu sözləri Sonxeber.az-a Milli Məclisin deputatı Ceyhun Məmmədov deyib.

O bildirib ki, bu gün Ermənistan və onun havadarlarının hələ də neofaşist ideologiyasını yaşatmaq niyyətini müşahidə edirik.

"Ermənistanda Nijdenin heykəli, Nemesis abidəsi ucalır, Fransa isə bu təcavüzkarlığın dirçəlməsinə bütün mümkün dəstəyi verməkdə israrlı görünür. Bu şər ittifaqının neofaşizmin arealını genişləndirməsinə imkan verməyən yeganə güc regional səviyyədə Azərbaycan Respublikası, qlobal müstəvidə isə Qoşulmama Hərəkatının Sədri cənab İlham Əliyevdir. Bu mənada, əlamətdar 9 may tarixində əminliklə demək olar ki, XXI əsrdə faşizmlə mübarizədə ən səmərəli fəaliyyət göstərən lider cənab İlham Əliyev, ən inamlı mübarizə aparan dövlət isə Azərbaycan Respublikasıdır".

Telegramda izləyin