Səyahət üçün ən münasib ölkələr hansıdır? - AÇIQLAMA

Qarşıdan yay tətili günləri gəlir. Hər il olduğu kimi bu il də Azərbaycan vətəndaşları ölkə hüdudlarından kənara səyahət etməyi planlaşdırırlar.

Bəs gəlin görək yay istirahəti üçün ən münasib ölkələr hansıdır?

Biz də BiG.AZ olaraq mövzu ilə bağlı Turizm üzrə ekspert Rəhman Quliyev ilə əlaqə saxlayaraq fikirlərini öyrəndik:

"Demək olar ki, bir neçə aydır erkən rezervasiyalar başlayıb. Türkiyə, Monteneqro və digər Avropa ölkələrinə turlar satılır. Amma buna baxmayaraq iqlim şəraitinə görə təkliflər fərqlidir. Yay mövsümündə əlverişli hava şəraiti olduğuna görə, xüsusilə, azərbaycanlı turistlər Türkiyə və Avropa ölkələrinə daha çox üstünlük verirlər.

Daha öncə ən çox satış bazarlarından biri də Ukrayna və Rusiya sanatoriyaları idi. Lakin, iki ildir ki, Rusiya və Ukrayna müharibəsi ilə bağlı hər iki ölkəyə giriş-çıxış məhdudiyyəti qoyulub".

Turizm üzrə ekspert Azərbaycan vətəndaşlarının hər il olduğu kimi bu il də qardaş Türkiyəyə daha çox üstünlük verməsinin səbəblərini belə izah etdi:

"Təbii ki, bu,Türkiyədə təhlükəsizliyin, əmin-amanlığın qorunub-saxlanması, yüksək səviyyədə xidmətin olması, eyni zamanda xidmətə görə qiymətin də münasibliyi ilə bağlıdır. Bu baxımdan demək olar ki, Azərbaycandan ən böyük kütlə Türkiyənin bir neçə şəhərinə birbaşa uçuşlar həyata keçirir. Bu siyahıda Antalya, Alanya, Ankara, İzmir, Dalaman, İstanbul kimi şəhərlər yer tutur. Bu ildən isə Trabzona, Bodruma birbaşa reyslər fəaliyyətə başlayıb.

Rəhman Quliyev həmçinin Avropa ölkələrinə səyahət düşünənlər üçün fikirlərini bölüşüb:

"Avropa ölkələrinə səyahətin viza baxımından bir çox problemləri var. Amma buna baxmayaraq daha öncədən vizası olanlar rahat şəkildə Avropaya səyahət edə bilirlər. Belə ki, Rusiya turistlərinin Avropaya getdikləri vaxt orada böyük turist kütləsi yaranırdı. Bu gün isə Rusiya, Belarusiya, Ukraynadan turist axını olmadığı üçün mehmanxanaların qiymətində az da olsa endirimlər müşahidə olunur.

Ümumiyyətlə, bu gün Avropaya birbaşa reyslərin sayının artırılması da qarşılıqlı turist mübadiləsinin göstəricisidir.

Şübhəsiz ki, dünya ölkələrinə turist axınının olması Azərbaycan iqtsadiyyatının irəliləməsindən xəbər verən amillərdəndir".

Telegramda izləyin