Evləriniz məcburi sığortalanmalıdır - İyunun 1-dən CƏRİMƏ OLUNACAQSINIZ!

Azərbaycanda iyunun 1-dən daşınmaz əmlakın icbari sığortası ilə bağlı yeni sistem fəaliyyətə başlayacaq. Bu sistemə görə, daşınmaz əmlakın icbari sığortası müqavilələri elektron olacaq. Bildirilir ki, icbari sığorta müqaviləsinin bağlanmadığı təqdirdə fiziki şəxslər 30 manat, vəzifəli şəxslər 80 manat, hüquqi şəxslər isə 200 manat məbləğində cərimə ediləcək.

Bununla bağlı iqtisadçı ekspert Eldəniz Əmirov AZXEBER.COM-a açıqlama verib.

O, daşınmaz əmlakın İcbari sığortasına birmənalı yanaşmağın doğru olmadığını deyir:

"Düşünürəm ki, daşınmaz əmlakın icbari sığortası məcburi olmamalıdır. Daşınmaz əmlakın növündən və yerləşdiyi yerdən asılı olaraq fərqlər qoyulmalıdır.

Məsələn, biri dağ kəndində digər evlərdən 1 km uzaqda ev tikib onun sığorta etdirilməsi bu insanın eyni zamanda hüququnun pozulmasıdır. Bu əmlak mənimdir, sığortalatırda bilərəm, sığortalatdırmaya da. Bəzi hallarda avtomobilləri misal gətirilər, ancaq avtomobilin sığortası üçüncü şəxsə qarşıdır. Bir mənzilin yanması belə başqa birinə zərər verməyəcəksə, onun məcburi şəkildə sığorta olunması doğru deyil. Sıx məskunlaşma zamanı mənzillərin sığortalamasının daha doğru olduğunu hesab edirəm".

İqtisadçı ekspertin sözlərinə görə, təkcə yerləşdiyi yerə görə sığorta haqqının fərqlənməsi deyil, ümumən məcburi sığortanın özünün konteksinə yenidən baxmaq lazımdır:

"Ödənilən sığorta haqqı 15 min, 20 min, 25 min manat həcmindədir. Bakı şəhərində bir mənzilin yanması zamanı dəyən xərc, onun sığorta xərci ilə müqayisədə çox azdır. Ona görə də hesab edirəm ki, sığorta məbləğlərinə yenidən baxmağa ehtiyac var. Eyni zamanda mənzillərin yerləşmə yerindən asılı olaraq diferensial yanaşma tətbiq olunmalıdır".

Telegramda izləyin