"Ermənistan Xarici İşlər Nazirliyinin yeganə yolu qərbdən kömək hədəfləyən məzlum bəyanatlara qalıb" - DEPUTAT

Ötən gün qeyri-qanuni erməni silahlı dəstələrinin üzvləri kənd təsərrüfatı işləri adı altında mühəndis texnikası cəlb etməklə Şuşa və Xocavənd rayonları istiqamətində döyüş mövqelərinə təminat yolunun çəkilməsi məqsədilə torpaq yolda genişləndirmə və təmir-bərpa işləri görməyə cəhd ediblər. Azərbaycan Ordusunun bölmələri tərəfindən görülən təxirəsalınmaz tədbirlər nəticəsində aparılan işlər dərhal dayandırılıb.

"Azərbaycan və Ermənistan arasında sülh müqaviləsi üzrə təmasların növbəti mərhələsi, Kişineu görüşü ərəfəsində Ermənistanın və separatçıların yenidən aktivləşməsi həm İrəvanın, həm də Xankəndidəki qondarma rejimin çarəsizliyin ifadəsidir. Hər kəsə bəllidir ki, Azərbaycanın sülh müqaviləsi ilə bağlı şərtləri dəyişməzdir və heç bir güc mərkəzi də bu şərtlərdə hansısa formada korreksiya edə bilməz. İlk olaraq ona görə ki, Cənab İlham Əliyevin mövqeyi beynəlxalq hüququn prinsiplərini ehtiva edən şərtlərinə qarşı çıxmaq əslində elə BMT Nizamnaməsinə qarşı çıxmaq olar ki, heç bir beynəlxalq subyekt belə bir riskə cəhd etməz".

Bu sözlər Sonxeber.az-a Milli Məclisin deputatı Bəhruz Məhərrəmov deyib.

O bildirib ki, qərb enerji təhlükəsizliyində müstəsna rol oynayan Azərbaycanı və güvənilir tərəfdaş, eyni zamanda da qlobal siyasi oyunçu olan cənab İlham Əliyevi qarşısına almaq niyyətində deyil.

"Azərbaycan siyasi və iqtisadi cəhətdən tam müstəqildir və bu, Bakıya imkan verir ki, istənilən mümkün xarici təsiri neytrallaşdırsın.Ermənistan vəziyyətin ciddiliyinin fərqindədir və başa düşür ki, Qarabağ məsələsində söz sahibi deyil, bu, Azərbaycanın daxili işidir. Müqavimət göstərmək əbəsdir, buna İrəvanın nə gücü, nə imkanı, nə də nüfuzu yoxdur. Ermənistan Xarici İşlər Nazirliyinin yeganə yolu qərbdən kömək hədəfləyən məzlum bəyanatlara qalıb. Eyni zamanda separatçılar da sonlarının gəldiyinin fərqindədir və bu mənada daşımalarla, yaxud "mövqelərində" hərəkətlənmə ilə sadəcə öz qiymətlərini daha baha göstərməyə çalışırlar. Amma bunun Bakı üçün əhəmiyyəti varmı? Cənab İlham Əliyevin mövqeyi qətidir, dərhal qondarma qurum və vəzifələrdən imtina edilməzsə, lazımi addımlar atılacaq, yox Azərbaycanın məsləhətinə əməl edərlərsə, amnistiya mümkündür. Ermənistan və separatçılar bu bəyanatı fərqli donda ajiotaja çevirmək istəsələr də Vaşinqtondan gələn bəyanat onların ümidini qırdı. ABŞ Dövlət Departamentinin mətbuat katibi Metyu Miller bildirdi ki, - "biz amnistiya məsələsinə baxılması ilə bağlı Prezident Əliyevin son fikirlərini alqışlayırıq".

Belə bir situasiyada, təbii ki, Ermənistanın manevr imkanları geniş deyil. Hətta Makron amili belə İrəvana hansısa formada dividend gətirə bilməz, ən çoxu prosesi uzada bilər. Prosesin uzanması ssenarisinə isə Bakı hazırdır. Cənab Prezident Laçında açıq formada ifadə etdi ki, "Onlar bizim şərtlərimizi qəbul etməlidirlər. Delimitasiya istəmirlərsə, olmasın delimitasiya. Onda nə olacaq, harada desək, sərhəd də orada olacaq. Onlar bilirlər ki, biz bunu edə bilərik. Heç kim onlara kömək etməz, nə Avropadan gələn pensiyaya çıxmış Fransa polisləri, nə də başqaları, heç kim".

Telegramda izləyin