İndoneziyanın müdafiə naziri Ukrayna ilə bağlı sülh planını açıqlayıb

İndoneziyanın müdafiə naziri Prabovo Subianto Ukraynadakı münaqişənin sülh yolu ilə həlli planını, o cümlədən, atəşkəs, silahsızlaşdırılmış zonanın yaradılması və BMT sülhməramlılarının yerləşdirilməsi ilə bağlı təkliflər irəli sürüb.

Nazir bu təşəbbüsü Sinqapurda davam edən "Shangri-La Dialogue" təhlükəsizlik konfransındakı çıxışında səsləndirib.

İndoneziya planının birinci bəndinə əsasən hər iki tərəf dərhal atəşkəs elan etməlidir. İkincisi – tərəflər yeni silahsızlaşdırılmış zona yaratmaq üçün hazırkı mövqelərindən 15 km geri çəkilməlidir.

Nazir əlavə edib ki, bundan sonra beynəlxalq sülhməramlı qüvvələr silahsızlaşdırılmış zonaya tez bir zamanda yerləşdirilməlidir.

O, həmçinin hesab edir ki, sakinlərin əksəriyyətinin iradəsini obyektiv şəkildə təsdiqləmək üçün BMT mübahisəli ərazilərdə referendum təşkil etməli və keçirməlidir.

Subianto belə ərazilər dedikdə nə nəzərdə tutulduğunu dəqiqləşdirməyib. Onun sözlərinə görə, İndoneziya bütün bu proseslərdə iştirak etməyə, o cümlədən BMT-nin sülhməramlı missiyası çərçivəsində öz ordusunu göndərməyə hazırdır.

Report.az

Telegramda izləyin