Avtobuslar qarajda, sərnişinlər dayanacaqda: Sürücülər niyə işləmək istəmir? - İQTİSADÇIDAN AÇIQLAMA

Avtobuslar qarajlarda dayanır, sərnişinlər isə dayanacaqlarda uzun müddət gözləyir. Ortada isə ciddi bir sual yaranır: problem avtobus çatışmazlığındadır, yoxsa bu avtobusları idarə edəcək sürücülərin olmamasında?

Marşrut sürücülərinin sözlərinə görə, qarajlarda işlək avtobuslar kifayət qədərdir, lakin sükan arxasına keçəcək sürücü tapılmır. Sürücülərin bu sahədə işləmək istəməməsi isə ictimai nəqliyyatda idarəetmə, əməkhaqqı və iş şəraiti ilə bağlı ciddi problemlərin ola biləcəyini göstərir. Bəs sürücünü avtobusdan uzaqlaşdıran nədir?
Mövzu ilə bağlı Liberal İqtisadçılar Mərkəzinin sədri Akif Nəsirli Sonxeber.az-a açıqlamasında bildirdi ki, əsas səbəblərdən biri sürücülərin gördüyü işlə aldıqları əməkhaqqı arasındakı nisbətin onları qane etməməsidir. Onun sözlərinə görə, marşrut sürücülərinin iş qrafiki uzun, məsuliyyəti və stressi yüksəkdir: "Yol hərəkəti, sərnişinlərlə ünsiyyət, tıxac və qəza riski də işin yükünü artırır. Bundan başqa, işin sosial təminat, məzuniyyət və digər əmək şəraiti baxımından yetərincə cəlbedici olmaması sürücü çatışmazlığını dərinləşdirə bilər. Yaşlı sürücülərin sektordan çıxması, gənclərin isə daha rahat və sabit işlərə üstünlük verməsi də bu problemi artırır.

Ona görə qarajlarda avtobusların olması problemin yalnız nəqliyyat vasitələrinin sayında olmadığını göstərir. Əsas məsələ sürücü əməyinin şərtlərinin və gəlirinin bu işə yeni insanları cəlb edəcək səviyyədə olub-olmamasıdır".

Müəllif: İlkin Məmmədkərimov

Telegramda izləyin