"Ulu öndər Heydər Əliyev dövlətimizin müstəqilliyini qoruyaraq, ölkəmizdə tüğyan edən böhranı aradan qaldırdı" - DEPUTAT

"15 iyun Azərbaycan tarixinə Milli Qurtuluş Günü kimi daxil olub".

Bunu Sonxeber.az-a açıqlamasında deputat Cavanşir Paşazadə bildirib.

Deputat qeyd edib ki, ulu öndər Heydər Əliyev dövlətimizin müstəqilliyini qoruyaraq, ölkəmizdə tüğyan edən böhranı aradan qaldırdı:

"Xalqın istəyi ilə ikinci dəfə hakimiyyətə qayıdan ulu öndər Heydər Əliyev iyunun 15-də Azərbaycan Ali Sovetinin sədri seçildi. Həmin dövrün çətinliklərinə baxmayaraq ulu öndər Heydər Əliyev xalqın qurtuluşu missiyasını cəsarətlə öz üzərinə götürdü. Milli Məclisin 1993-cü il iyunun 15-də keçirilən iclasındakı çıxışında ulu öndər Heydər Əliyev Azərbaycan dövlətçiliyinin gələcək inkişaf strategiyasını elan etdi. Sonrakı dövrdə isə qarşıya qoyulan bütün hədəflərə çatıldı. Məhz ümummilli lider Heydər Əliyevin iradəsi sayəsində biz müstəqilliyimizi qoruyub saxlaya bildik. Həmin tarixi gün Azərbaycan xalqının yaddaşında Milli Qurtuluş Günü kimi həkk olundu, 1997-ci ilin iyun ayında isə Milli Məclis tərəfindən milli bayram elan edildi.

Deputat vurğulayıb ki, bəzi qüvvələr tərəfindən yaradılan bütün maneələrə baxmayaraq ən qısa müddətdə ölkəmizdə ictimai-siyasi sabitlik bərpa olundu:

"Əlbəttə ki, yaranan sabitlik bəzilərini narahat edirdi. AXC-Müsavat hakimiyyəti ulu öndər Heydər Əliyevin uğurlarını qısqanclıqla qarşılayaraq müxtəlif yollarla ona mane olmağa çalışırdı. Bütün maneələri səbirlə aşan ulu öndər Heydər Əliyev televiziya vasitəsilə xalqa müraciət etdi. İyunun 20-də Azərbaycan həqiqətlərinin dünya ictimaiyyətinə çatdırılması məqsədilə yerli və xarici jurnalistlər üçün brifinq keçirdi. İyunun 21-də isə bir sıra ölkələrin diplomatları ilə görüş keçirdi. Bununla da bu sahədə ulu öndər Heydər Əliyevin yürütdüyü uğurlu siyasət respublikanı informasiya blokadasından çıxardı".

Deputat söyləyib ki, ulu öndər Heydər Əliyevin şəxsiyyəti, yüksək idarəetmə qabiliyyəti, qətiyyəti, və uzaqgörənliyi sayəsində dövlətimizdə böhrana son qoyuldu. Ən önəmlisi ölkəmizdə vətəndaş qarşıdurmasına birdəfəlik son qoyuldu. Ulu öndər Heydər Əliyevin zəhmətləri sayəsində ölkəmiz xaosdan, sosial-iqtisadi böhrandan və siyasi çəkişmələrdən xilas oldu. Əmin-amanlıq, siyasi sabitlik yarandı. Dövlətimizdə hər bir sahədə inkişaf başlandı.

Bilirsiniz ki, 15 iyun həm də Şuşa bəyannaməsinin imzalandığı tarixdir. Sabah həm də Şuşa bəyannaməsinin imzalanmasının ikinci il dönümünü qeyd edəcəyik. Şuşa Bəyannaməsi iki qardaş ölkə arasında imzalanan tarixi anlaşmadır".

Telegramda izləyin