"Azərbaycanla Pakistan arasında sərmayə, enerji və müdafiə sahələrində böyük layihələrin həyata keçirilməsi nəzərdə tutulub"- Deputat

"Pakistan işğal dövründə hər zaman bütün beynəlxalq təşkilatlarda Azərbaycanın ərazi bütövlüyünü və suverenliyini dəstəkləmiş, 44 günlük Vətən Müharibəsində ölkəmizin yanında olmuşdur. Ermənistanın Azərbaycan torpaqlarını işğal etməsi səbəbindən Pakistan Ermənistanla diplomatik əlaqələr yaratmamış və onun müstəqilliyini tanımamışdır".

Bu sözləri Milli Məclisin deputatı Kamilə Əliyeva Sonxeber.az-a deyib.
O qeyd edib ki, Azərbaycanla Pakistan arasında sərmayə, enerji və müdafiə sənayesi sahələrində yaxın gələcəkdə böyük layihələrin həyata keçirilməsi nəzərdə tutulmuşdur. Ölkələrimiz arasında digər sahələrlə yanaşı təhsil sahəsində də əməkdaşlığın genişləndirilməsi haqqında müzakirələr aparılmışdır:

"Azərbaycana dost və qardaş ölkələrdən biri də Pakistan İslam Respublikasıdır. Ölkələrimiz və xalqlarımız arasında münasibətlər birgə tarix, mədəniyyət, din və qarşılıqlı dəstək üzərində qurulub. Azərbaycanla Pakistan bütün beynəlxalq təşkilatlarda vahid siyasi mövqedən çıxış edir, ölkələrimiz arasında sıx siyası, iqtisadi əlaqələr mövcuddur.
Cari ilin iyun ayının 15-də Pakistan İslam Respublikasının Baş naziri Məhəmməd Şahbaz Şərifin ölkəmizə səfəri iki ölkə arasında mövcud əlaqələrin genişlənməsinə böyük təkan verəcək. İki dövlətin liderlərinin təkbətək və nümayəndə heyətlərinin iştirakı ilə keçirilən görüşdən sonra mətbuata bəyanatla çıxış etdilər. Prezident cənab İlham Əliyev çıxışında Azərbaycanla Pakistan arasında mövcud iqtisadi, siyasi əlaqələr və gələcəkdə bu istiqamətdə görüləcək birgə layihələr barədə məlumat verdi. Pakistan işğal dövründə hər zaman bütün beynəlxalq təşkilatlarda Azərbaycanın ərazi bütövlüyünü və suverenliyini dəstəkləmiş, 44 günlük Vətən Müharibəsində ölkəmizin yanında olmuşdur. Ermənistanın Azərbaycan torpaqlarını işğal etməsi səbəbindən Pakistan Ermənistanla diplomatik əlaqələr yaratmamış və onun müstəqilliyini tanımamışdır. Azərbaycan da Kəşmir məsələsində hər zaman beynəlxalq təşkilatlarda Pakistanın mövqeyini dəstəkləmişdir. Ölkələrimiz arasında bu cür sıx siyasi münasibətlər xalqlarımız arasında da dostluq əlaqələrini möhkəmləndirmişdir.
Bu gün Pakistan ordusu dünyada ən güclü ordular sırasında ön yerlərdə qərarlaşmışdır. Azərbaycan Ordusu ilə Pakistan Ordusu birgə hərbi təlimlər keçirir və bu təlimlər orduların peşəkarlığının artmasına öz töhfəsini verir. İqtisadi sahədə də əlaqələrin genişləndirilməsi və ticarət dövriyyəsinin artırılması istiqamətində iki ölkə arasında bir çox sənədlər imzalanmışdır. Azərbaycanla Pakistan arasında sərmayə, enerji və müdafiə sənayesi sahələrində yaxın gələcəkdə böyük layihələrin həyata keçirilməsi nəzərdə tutulmuşdur. Ölkələrimiz arasında digər sahələrlə yanaşı təhsil sahəsində də əməkdaşlığın genişləndirilməsi haqqında müzakirələr aparılmışdır. Azərbaycanla Pakistan arasında mövcud dostluq, qardaşlıq əlaqələri möhkəm təməl üzərində qurulmuş və gələcəkdə daha yüksək səviyyəyə qalxacaq".

Telegramda izləyin