Şirkətlə məcburi köçkünlər arasında qalmaqal: Altı ailə niyə köçmək istəmir? - AÇIQLAMA

Bakıda şirkət aldığı kompleksdə yaşayan bir qrup keçmiş məcburi köçkün ailəsi ilə razılığa gələ bilmir.

Bu barədə Oxu.Az-a şikayətçi "SAS 2015" mənzil-tikinti kooperativinin rəhbərliyi müraciət edib.

Şirkət rəsmisi iddia edir ki, bir qrup məcburi köçkün ailəsi "SAS 2015" MTK-ya məxsus kompleksdən çıxmaq istəmir:

"Bu səbəbdən də MTK ilə Qaçqınların və Məcburi Köçkünlərin İşləri üzrə Dövlət Komitəsi arasında razılaşma əldə edilib. Mövcud olan razılaşmaya görə, Dövlət Komitəsi tərəfindən altı ailə və onların ailə üzvləri üçün Bakı şəhəri, Qaradağ rayonu ərazisində inşa olunmuş "Qobu Park-3" yaşayış kompleksində mənzillər ayrılıb.

Mülkiyyət hüququ ilə "SAS 2015" MTK-ya məxsus Xırdalan şəhəri, H.Əliyev prospekti 518 saylı ünvanda yerləşən 0,4288 ha torpaq sahəsi və həmin torpaq sahəsində olan 1050,1 kvadratmetrlik kompleksin həmin məcburi köçkün ailələri tərəfindən boşaldılması ilə bağlı Abşeron Rayon Məhkəməsinin 10.08.2021-ci il tarixli qətnaməsi qanuni qüvvəsini alıb və icra mərhələsindədir. Məhkəmə instansiyaları qərar qəbul edərkən həmin şəxslərin dövlət tərəfindən mənzillərlə təmin olunduqlarını əsas götürüblər. Lakin qeyd olunan mənzillərdə başqa şəxslər yaşayırlar. Bu nə deməkdir?

Tərəfimizdən məcburi köçkün ailələrinə ayrılmış mənzillərə baxış keçirilib və müəyyən olunub ki, qeyd olunan mənzillərdə başqa şəxslər yaşayırlar. Bu hal da qanuni qüvvəsini almış məhkəmə qətnaməsinin icrasını mümkünsüz edir. Nəzərə alsaq ki, qətnamə dövlətin adından çıxarılır və icrası məcburidir, belə olan halda Qaçqınların və Məcburi Köçkünlərin İşləri üzrə Dövlət Komitəsinin məhkəmənin gedişatında sözügedən məcburi köçkün ailələrinin mənzillərlə təmin olunmaları ilə bağlı məktub verməsi, məhkəmənin həmin sübutu nəzərə alaraq iddianı təmin etməsi və həmin qətnamə qanuni qüvvəsini alandan sonra razılaşmanın pozulması, mənzillərin başqa şəxslərə veriləcəyi ilə bağlı məlumat tərəfimizdən başadüşülən deyil.
Komitənin məsul şəxslərinin qeyd olunan qanunsuz hərəkətləri Cinayət Məcəlləsinin (CM) 308-ci maddəsinin tərkibini yaradır. İlk olaraq bununla bağlı sizə müraciət edirik. Əgər, həqiqətən, bizim razılaşmamız pozularaq məcburi köçkün ailələrinə ayrılmış mənzillər başqa şəxslərə verilibsə və həmin mənzillər boşaldılmayacaqsa, bununla bağlı tərəfimizdən hüquq-mühafizə orqanlarına müraciət olunacaq".

Məsələ ilə bağlı Qaçqınların və Məcburi Köçkünlərin İşləri üzrə Dövlət Komitəsindən Oxu.Az-ın sorğusuna cavab olaraq bildirilib ki, Abşeron rayonu, Xırdalan şəhərində, "Köhnə statistika" deyilən ərazidə məskunlaşmış məcburi köçkünlər 2018-ci ilin dekabr ayında Sumqayıt şəhəri 12-ci mikrorayon və Abşeron rayonu ərazisində yeni istifadəyə verilmiş yaşayış kompleksində yeni mənzillərlə təmin ediliblər:

"Dövlət Komitəsi tərəfindən məcburi köçkünlərin köçürülməsi mövcud normativ hüquqi aktlara uyğun olaraq, könüllü şəkildə aparılıb. Adıçəkilən ünvanın köçürülməsi zamanı doqquz məcburi köçkün ailəsi müvəqqəti yaşayış sahəsində qalmaq istədiyini qeyd edərək, köçməkdən imtina edib. Daha sonra həmin şəxslərə ailə tərkibinə uyğun olaraq, "Qobu Park-3" yaşayış kompleksində mənzillər verilib. Ailələrdən üçü köçüb, digər ailələr isə yenidən yeni mənzillərə köçməkdən imtina ediblər. Diqqətinizə çatdırırıq ki, xüsusi təyinatlı yaşayış sahələrinin kirayə müqaviləsinin şərtlərinə əsasən, mənzillə təmin edilmiş şəxslər yaşayış sahəsində fasiləsiz olaraq üç aydan artıq müddətdə yaşamadıqda və ya köçməkdən imtina etdikdə verilmiş mənzil geri alınaraq ehtiyacı olan digər şəxslərə verilir. Xırdalan şəhərində, "Köhnə statistika" deyilən ərazidə məskunlaşmış altı məcburi köçkün ailəsi verilmiş mənzillərə köçmədiklərindən boş qalan mənzillərə ağır şəraitdə yaşayan digər məcburi köçkün ailələri köçürülüblər".

Telegramda izləyin