Uşağa qulluğa görə müavinət ARTIRILIR: Növbəti illər üçün də GÖZLƏNTİ var - Deputat

Üç yaşınadək uşağı olan analara aylıq 100 manat müavinət verilməsi ailələrə göstərilən sosial dəstək baxımından mühüm məsələdir. Lakin mövcud qiymətlər fonunda uşağın qidalanması, geyimi, gigiyena vasitələri və digər gündəlik ehtiyacları üçün bu məbləğin nə dərəcədə yetərli olduğu müzakirə doğurur. Digər tərəfdən, uşaqpulunun artırılması və sosial dəstəyin daha geniş ailə qrupunu əhatə etməsi təklifləri də gündəmə gəlir.

Bəs, aylıq 100 manatlıq müavinət ailələrin maddi yükünü nə dərəcədə azalda bilər? Uşağın real gündəlik xərcləri nəzərə alınarsa, uşaqpulunun məbləği artırılmalı və bu dəstək bütün ailələrə, yoxsa daha geniş sosial meyarlara uyğun olaraq ehtiyacı olanlara şamil edilməlidir?
Mövzu ilə bağlı Sonxeber.az-a açıqlama verən Milli Məclisin deputatı Vüqar Bayramov bildirib ki, üç yaşınadək uşağa qulluğa görə verilən müavinətin məbləğində təxminən 3 faizlik artım olacaq.

"Eyni zamanda, uşaqlı ailələrə verilən müavinətlərin artımı bununla məhdudlaşmır. Uşağın doğulmasına görə verilən birdəfəlik müavinətin məbləği də 600 manatdan 1500 manata yüksəldilir. Ona görə də burada əsas diqqət çəkən məqam müsbət dinamikadır. Növbəti il bu müavinətlərdə ciddi artım nəzərdə tutulur. Bu isə artım tendensiyasının davam etdiyini göstərir. Söhbət 100 manatın son məbləğ olmasından getmir. Bu, yekun rəqəm deyil və növbəti illərdə müavinətlərin məbləğinə yenidən baxılaraq artırılması mümkündür. Əsas məqam bu müsbət dinamikanın formalaşmasıdır. Bu tendensiya onu deməyə əsas verir ki, müavinətlərin artırılması növbəti illərdə də davam etdiriləcək".

Röyalə Xəyal

Telegramda izləyin