Rövşən Nəcəf: "Neftçi" azarkeşlərindən səbirli olmalarını istəyirik"

"Çıxdığımız yolda "Neftçi" azarkeşlərindən səbir və etimad gözləyirik".

"Report xəbər verir ki, bunu "Neftçi" PFK-nın Müşahidə Şurasının sədri, SOCAR-ın prezidenti Rövşən Nəcəf mətbuat konfransında deyib.

O bildirib ki, klubun son dövrlərdə fəaliyyəti ürəkaçan deyil:

"Klubda təkrar canlanmanı təmin etmək üçün strategiya hazırlanır. "Neftçi" azarkeşləri hər zaman klubun yanında olublar, heç vaxt dəstəklərini əsirgəməyiblər. Biz gördüyümüz işlər nəticəsində "Neftçi"nin yenidən yerli və beynəlxalq yarışlarda qələbələrlə azarkeşlərini sevindirəcəyinə inanırıq".

O bildirib ki, "Neftçi İdman Klubu Futbol Akademiyası"nın infrastrukturunun təkmilləşdirilməsi və gücləndirilməsi nəzərdə tutulur.

R.Nəcəf qeyd edib ki, ümumi strategiya formalaşdırılıb və yeni idarəetmə sistemi qurulub:
"Bu prosesdə bir neçə bacarıqlı məşqçilərlə görüşlər keçirdik. Bizim seçimimizdə əsas meyar "Neftçi"nin qarşısına qoyduğu əsas hədəfləri anlayan, məqsədlərimizə çatmaqda daim bizimlə olmağa hazır peşəkar məşqçini müəyyənləşdirməkdir".

Telegramda izləyin