Yaralı pakistanlının üstündən tullanaraq zirvəyə qalxan alpinistlər gündəm oldu

Norveçli alpinist Kristin Harila və komandasının Pakistanda dünyanın ikinci ən yüksək zirvəsi olan K2 zirvəsinə qalxarkən yıxıldıqdan qısa müddət sonra ölən yükdaşıyanın üzərindən tullanaraq dırmaşmağa davam etdikləri iddia edilib.

Kristin Harila iyulun 27-də üç ay ərzində 14-cü zirvəsinə qalxaraq dünya rekordunu qırmaq üçün K2 dağına qalxıb. Həmin vaxt 35 yaşlı pakistanlı Məhəmməd Həsən sıldırım qayadan yıxılıb. Harila komandasının Həsəni xilas etmək üçün hər şeyi etdiyini, lakin şəraitin onu daşımaq üçün çox təhlükəli olduğunu söyləyib.

Hadisə ilə bağlı ortaya çıxan fotoşəkillərdə alpinistlərin yerdə uzanmış Həsənin üzərindən tullanaraq dırmanmağa davam etdikləri görünür.

Həmin gün K2 zirvəsinə qalxan avstriyalı alpinistlər Vilhelm Steindl və Filip Flamiq bildiriblər ki, hadisə yerində dronla lentə aldıqları görüntülərdə alpinistlər Həsəni xilas etmək əvəzinə onun üzərindən tullanırlar.

Avstriya mərkəzli "Standard" qəzetinə danışan Flamiq açıqlamasında "Hər kəs zirvəyə qalxmağa davam edərkən, yalnız bir nəfər onu xilas etməyə çalışdı. Bölgədə dərhal hərəkətə keçə biləcək şerpalar və dağ bələdçiləri olsa da, mütəşəkkil bir xilasetmə əməliyyatı həyata keçirilmədi" sözlərinə yer verib.

Steindl isə "Alp dağlarında belə bir şeyin baş verməsini təsəvvür edə bilməzsiniz. Ona ikinci dərəcəli insan kimi yanaşırdılar. Əgər o, qərbli olsaydı, dərhal xilas edilərdi. Heç kim onun üçün məsuliyyət hiss etmirdi. Orada bir rüsvayçılıq baş verdi. Rekord qıra bilmək üçün canlı bir insan arxada buraxıldı" ifadələrini işlədib.

İttihamları rədd edən Harila, "Ona kömək etmək üçün heç bir şey etmədiyimizi söyləmək doğru deyil. 1,5 saat onu daşımağa çalışdıq. Sonra operatorumuz ona qulluq etmək üçün 1 saat gözlədi. Onu heç vaxt tək buraxmadıq",-deyə bildirib.

Pis hava şəraitinə diqqət çəkən Harila deyib:

"Həmin şəraitdə onun necə xilas ola biləcəyini müəyyən etmək çətin idi. O, dağın ən təhlükəli yerində yıxılmışdı. Yolun dar olması və qar şəraiti səbəbindən kimisə daşımaq şansı məhdud idi".

K2, qalxması ən çətin dağ zirvələrindən biri hesab olunur. Mütəxəssislər hesab edirlər ki, K2-nin topoqrafiyası Everestdən daha çətindir, çünki daha az düzənlik sahələri var. Dağda uçqun və qayaların olması riski də yüksəkdir.

2018-ci ilin məlumatlarına görə, K2-yə edilən dırmanışların ölümlə nəticələnməsi nisbəti 5-də 1-dən çoxdur.

Publika.az

Telegramda izləyin