"Rusiya sülhməramlılarının Ağdam-Xankəndi yolunun üzərinə tikanlı məftillər qoyması hüququn kobud pozuntusudur"- Bəhruz Məhərrəmov

"Rusiya sülhməramlılarının Qızıl Aypara Cəmiyyəti tərəfindən Bakıdan yola salınan yardım karvanının hərəkətinə maneə yaratmaq üçün Ağdam-Xankəndi yolunun üzərinə tikanlı məftillər qoyması həm beynəlxalq, həm də milli hüququn kobud pozuntusudur".

Bu sözləri Milli Məclisin deputatı Bəhruz Məhərrəmov Sonxeber.az-a bildirib.

O qeyd edib ki, burada əsas məqsəd Qarabağın erməni sakinlərinə real durumun 30 il ərzində Ermənistanın düşmənçilik və milli nifrət aşılayan təbliğatından fərqli olduğunu, Azərbaycanın öz erməni vətəndaşlarına düşmən kimi baxmadığını göstərməkdir:

"1949-cu il Cenevrə Konvensiyaları və onun 1977 və 2005-ci illər Əlavə Protokollarına, Beynəlxalq Qırmızı Xaç və Qırmızı Aypara Hərəkatının beynəlxalq fəaliyyətinin təşkili haqqında 1997-ci il Sevilya Sazişinə, Hərəkatın Nizamnaməsinə əsasən qanuni əsasda təşkil olunan, dövlətlərin suverenliyi prinsiplərinə zidd olmayan humanitar fəaliyyətlərə maneə yaradılması yolverilməzdir.

Ötən ilin dekabrına qədər Laçın yolu vasitəsilə Ermənistandan, İrandan, Fransadan silah-sursat daşıyan çoxsaylı karvanları görməzdən gələn Rusiya sülhməramlılarının Ağdam-Xankəndi yolu üzərində hərəkətə maneə yaratması eyni zamanda ikili standartların göstəricisidir.

Azərbaycana aydındır ki, Rusiya sülhməramlılarının müvəqqəti nəzarət zonası olan ərazilərimizdə heç bir humanitar böhran mövcud deyil. Lakin buna rəğmən rəsmi Bakı Azərbaycan Qızıl Aypara Cəmiyyəti tərəfindən Qarabağda yaşayan erməni əsilli şəxslərin mümkün ehtiyaclarının qarşılanması üçün Xankəndiyə humanitar yardım karvanı yola salıb. Burada əsas məqsəd Qarabağın erməni sakinlərinə real durumun 30 il ərzində Ermənistanın düşmənçilik və milli nifrət aşılayan təbliğatından fərqli olduğunu, Azərbaycanın öz erməni vətəndaşlarına düşmən kimi baxmadığını göstərməkdir. Humanitar təşəbbüslə reinteqrasiya prosesində Azərbaycan səmimiliyini və xoş niyyətini, eyni zamanda Ağdam-Xankəndi yolunun işlək, təhlükəsiz və daha səmərəli olduğunu, habelə Qarabağın erməni sakinləri üçün isə yeganə nicatın dalana dirənmiş, özü yardımlar hesabına ayaqda qalan Ermənistan yox, məhz bu yolla yalnız Azərbaycan olduğunu nümayiş etdirməkdədir. Bu proses, eyni zamanda Qarabağ ermənilərinin Azərbaycanın hakimiyyət orqanları ilə təmaslarında yeni bir mərhələ, qarşılıqlı etimad mühitinin möhkəmlənməsində mühüm amilə çevrilə bilər. Lakin görünən odur ki, humanitar karvanla bağlı terrora çağırış edən Qarabağdakı separatçı-radikal ünsürlərlə bərabər, Rusiya sülhməramlıları da bu missiyanın mümkün pozitiv nəticələrindən narahatdır".

Deputat vurğulayıb ki, Qarabağa silah-sursat daşınmasına göz yuman sülhməramlı kontingent Azərbaycan Qızıl Aypara Cəmiyyəti tərəfindən Qarabağda yaşayan erməni əsilli şəxslərin ehtiyaclarını qarşılamaq üçün Bakıdan yola salınan humanitar yardımın keyfiyyət sertifikatını tələb edir:

"Təsəvvür edin, müharibədən sonrakı iki il ərzində Qarabağa silah-sursat daşınmasına göz yuman, hətta göz yummaqla da kifayətlənməyib daşımalara aşkar dəstək verən, bu daşımaların təhlükəsizliyini təmin edən sülhməramlı kontingent Azərbaycan Qızıl Aypara Cəmiyyəti tərəfindən Qarabağda yaşayan erməni əsilli şəxslərin ehtiyaclarını qarşılamaq üçün Bakıdan yola salınan humanitar yardımın keyfiyyət sertifikatını tələb edir. Sual yaranır, əgər Laçın sərhəd-buraxılış məntəqəsi qurulmasaydı, Ermənistandan gələn "humanitar yüklər", yaxud Fransaya məxsus təxribat karvanından da keyfiyyət sertifikatı tələb olunacaqdımı? Yaxud Azərbaycan ərazilərində basdırılmış 2021-ci il istehsalı minalar müharibə cinayətlərinin davamı kimi sərhədlərimizdən qanunsuz əsaslarla keçirilib gətirilərkən sülhməramlılar belə həssaslıq göstərmişdilərmi?
Bu mənada sülhməramlılar, özlərinin qeyri-müəyyən mandatlarına uyğun olmayan qanunsuz fəaliyyətlərdən çəkinməli, Azərbaycan vətəndaşlarının Azərbaycan Konstitusiyasının 28-ci maddəsinin III hissəsində azadlıq hüququnun vacib elementlərinən biri kimi təsbit olunmuş sərbəst hərəkət imkanına, o cümlədən Rusiya Prezidentinin Azərbaycanın ərazi bütövlüyü və suverenliyinə dair mövqeyinə hörmətlə yanaşmalıdırlar".

Şəbnəm Lətifi

Telegramda izləyin