Ruben Vardanyanın övladları dünya liderlərini onun həbsdən azad edilməsinə kömək etməyə çağırıb

Ruben Vardanyanın övladları dünya liderlərinə və insan haqları müdafiəçilərinə müraciət edərək atalarının Azərbaycanda həbsdən azad olunmasına köməklik göstərməyə çağırıblar.

Sonxeber.az xəbər verir ki, bu barədə erməni mətbuatı məlumat yayıb.

"Ruben Vardanyanın dörd övladı olaraq biz hörmətlə dünya liderlərini, insan haqları müdafiəçilərini və medianı atamızı Azərbaycanda qanunsuz həbsdən azad etmək üçün təcili yardıma çağırırıq. Biz onun səhhətindən narahatıq. Biz tutulandan bəri onunla əlaqə saxlaya bilməmişik. Bir ildən çoxdur ki, atamız Qarabağ xalqının təhlükəsizliyini və hüquqlarını qorumaq istədiyi üçün onlarla yaşamaq qərarına gəlib. O, bunu o qədər güclü hiss edirdi ki, hər şeyi arxada qoyub blokada, mühasirə və müharibə şəraitində onlarla bərabər sıxıntı içində yaşayırdı.Azərbaycan hökumətinin sentyabrın 19-da kütləvi məcburi köçkünlük və humanitar fəlakətlə nəticələnən sonuncu təcavüzündən sonra o, xüsusi olaraq seçilərək həbs edilib.
Biz onun regiondakı siyasi gərginliyin növbəti qurbanına çevrilməsini istəmirik, xüsusən də onun missiyası həmişə eyni gərginliyi azaltmaq və uzunmüddətli münaqişənin sülh yolu ilə həllini tapmaq olub.Atamız humanistdir və heç vaxt hərbi fəaliyyətlə məşğul olmayıb. O, ən böyük humanitar fondlardan biri olan Aurora Humanitar Təşəbbüsünü məhz bütün dünyada sülh və insan haqlarını təşviq etmək üçün təsis edib. Eyni səbəbdən o, son onilliklər ərzində regionun təhsil və mədəniyyətinin qorunmasına, o cümlədən Şuşada kilsələrin və məscidin bərpasına böyük sərmayə qoyub. Ermənilərin fəal və görünən humanitar lideri kimi o, indi özünü uzunmüddətli siyasi münaqişənin və qeyri-şəffaf ədalət sisteminin qurbanı hesab edir.
Onun övladları olaraq sizi atamızın və haqsız yerə həbs edilmiş bütün ermənilərin hüquqlarını müdafiə etməyə və onun təcili, təhlükəsiz və qeyd-şərtsiz azadlığa buraxılmasına çağırırıq. Heç bir insan əqidəsinə, dininə və milli mənsubiyyətinə görə həbs edilməməli və mühakimə olunmamalıdır. Atamızın sağ-salamat yanımıza qayıtması üçün dua edir və sizdən təcili yardım diləyirik" ,- deyə bildiriblər.

Qeyd edək ki, 1968-ci il təvəllüdlü Ruben Vardanyan Karlenoviçin Azərbaycan Respublikası Cinayət Məcəlləsinin 214-1 (terrorçuluğu maliyyələşdirmə), 279.3 (qanunvericiliklə nəzərdə tutulmayan silahlı birləşmələrin və ya qrupların yaradılmasında və fəaliyyətində iştirak etmə) və 318.1-ci (Azərbaycan Respublikasının dövlət sərhədini qanunsuz olaraq keçmə) maddələri ilə nəzərdə tutulan cinayət əməllərini törətməsinə əsaslı şübhələr müəyyən edilib.

Şəbnəm Lətifi

Telegramda izləyin