İsrail həkimləri Xankəndində partlayışda zərərçəkənlərə yardım etmək üçün Ermənistana göndərilib

Ümumdünya Səhiyyə Təşkilatının (ÜST) müraciəti əsasında İsrail Dövlətinin Səhiyyə Nazirliyi sentyabrın 25-də Xankəndində yanacaq anbarında baş vermiş partlayış nəticəsində zərər çəkənlərə təcili tibbi yardım göstərmək üçün Ermənistanın paytaxtı İrəvana iki həkim göndərib.

Sonxeber.az xəbər verir ki, bu barədə İsrailin Ermənistandakı səfiri Coel Lion "X" sosial şəbəkəsində bildirib.

İki həkim İsraildəki Soroka Tibb Mərkəzinin Yanıq bölməsinin direktoru Dr. Yaron Şoham və İsrailin Şaare Zedek Tibb Mərkəzində plastik və rekonstruktiv cərrahiyyə üzrə ekspert doktor Adi Maisel Lotandır.
"Yanacaq anbarında baş verən partlayış geniş dağıntılara səbəb olub və çoxsaylı insan tələfatı ilə nəticələnib. Yaralıların çoxu müalicə üçün İrəvana aparılıb və İsrail həkimləri yerli tibb qruplarına bu xəstələrə qulluq etmək üçün öz təcrübələrini təqdim edəcəklər.İsrail hökuməti Ermənistan xalqı ilə dərin həmrəyliyini və bu faciədən sonra yardım göstərmək öhdəliyini ifadə edib. Bu iki həkimin göndərilməsi İsrailin humanitar yardıma sadiqliyinə və erməni xalqına dəstəyinə sübutdur", - deyə bildirilib.

Şəbnəm Lətifi

Telegramda izləyin