"İnanırıq ki, BMT-nin missiyası da Azərbaycanın humanizm siyasətini düzgün qiymətləndirib, ədalətli rəy bildirəcək"- DEPUTAT

"BMT-nin missiyasının 30 ildən sonra işğaldan azad olunmuş Qarabağa gəlməsi olduqca mütərəqqi haldır. Məlumdur ki, 30 il müddətində Ermənistan BMT-nin missiya göndərməsinə imkan verməmiş yaxud da məhdud missiyalardan sonra onların gəldiyi nəticələrə ya məhəl qoymayıb, ya da onları təhrif edib. Ermənistanın 30 illik destruktiv yanaşmasından sonra BMT qətnamələrini təkbaşına icra edən Azərbaycanın öz torpaqlarına BMT-nin missiyasını dəvət etməsi dövlətin humanist mövqeyinin daha bir təzahürüdür. Onu da qeyd edək ki,bu səfər BMT-nin Azərbaycandakı rezident əlaqələndiricisinin himayəsi altında, BMT və Azərbaycan arasında Dayanıqlı İnkişaf üzrə Əməkdaşlığa dair Çərçivə sənədinə (2021-2025) uyğun olaraq həyata keçirilir. Azərbaycan haqlı olaraq BMT-nin missiyasından ədalətli mövqe nümayiş etdirməsini gözləyir. Nəzərə alsaq ki, BMT dünyanın ən böyük beynəlxalq təsisatıdır, bu zaman onun göndərdiyi missiyanın ədalətli rəy verməsi olduqca mühüm əhəmiyyət kəsb edir. Bu, həm beynəlxalq hüquq və ədalət baxımından, həm də regionda sülh və sabitliyin bərqərar olması baxımından təkan rolunu oynayacaqdır".

Bu fikirləri Sonxeber.az-a açıqlamasında Milli Məclisin üzvü Tamam Cəfərova deyib.

Deputat bildirib ki, Azərbaycan 30 il ərzində aidiyyəti qurumlardan, vasitəçi missiyasını üzərinə götürən dövlətlərdən ədalətli yanaşma gözlədi:

"Beynəlxalq hüququn norma və prinsiplərinə uyğun şəkildə özünün haqlı mübarizəsini apardı. Təəssüflər olsun ki, ötən müddət ərzində problemin həllinə cavabdeh olan qurumlar selektiv mövqe nümayiş etdirərək, status-kvonun saxlanılmasına səy göstərdilər. Nəticə isə göz qabağındadır. İkili standartlarla barışmayacağını bütün tribunlardan səsləndirən Azərbaycan nəticədə haqq savaşına başladı və öz ərazi bütövlüyün və suverenliyini bərpa etdi. Azərbaycan öz ərazi bütövlüyünü bərpa etməklə yanaşı, beynəlxalq hüququ və ədaləti də bərpa etdi. Azərbaycan 44 günlük Vətən müharibəsindəki misilsiz qələbəsindən sonra sülh prosesinin başlanması üçün təşəbbüs göstərməklə özünün humanist və sülhpərvər mövqeyini də bütün dünyaya nümayiş etdirmiş oldu. Azərbaycanın bütün humanist addımlarına hər dəfə Ermənsitan riyakar, qərəzli destruktiv münasibət ilə cavab verdi. Nəticə də göz qabağındadır. Hər dəfə düşmən ağır məğlubiyyətə uğradı.

Sonuncu dəfə lokal antiterror əməliyyatı nəticəsində dövlətimiz öz suverenliyini tam bərpa etdi. İndi isə hər şeydən əli üzülən Ermənistan ölkəmizi etnik təmizləmə ilə ittiham etməyə çalışır. Guya Azərbaycan Qarabağda etnik təmizləmə həyata keçirir. Halbuki, Azərbaycanın ermənilərə göstərdiyi humanist münasibət göz qabağındadır. Bölgəni tərk edən ermənilərdən niyə getdiklərini soruşanda hamısı istisnasız olaraq eyni cavabı verir: "gedin deyirlər biz də gedirik". Azərbaycan gedənlərə də, qalanlara da göstərdiyi humanizm və insanpərvərliklə Ermənsitanın bütün tezislərinin layiqli cavabını verir.
Onu da qeyd edək ki, BMT-nin missiyası səfər zamanı Azərbaycanın regionda həyata keçirdiyi cari humanitar fəaliyyət ilə tanış olub. Eləcə də, müəyyən infrastrukturun bərpası, qeyri-qanuni erməni silahlı qüvvələrinin tərksilahı və silah-sursatının müsadirə edilməsi prosesi, minalardan yaranan təhlükələr heyətin üzvlərinə nümayiş etdirilir. Artıq BMT missiyası Ağdam-Xankəndi yolu ilə, "Laçın" sərhəd-nəzarət buraxılış məntəqəsinə gedərək müşahidə aparıblar. Onlar Qarabağ ermənilərinin məcburi deyil, könüllü surətdə Ermənistana getmələrinə şahidlik etdilər. Halbuki, dövlətimiz onlara vətəndaşlıq təklif edir".

Millət vəkili T.Cəfərova xüsusilə vurğulayıb ki, Azərbaycan çoxmillətli, çoxkonfessialı dövlətdir:

"Burada yaşayan bütün etnik qrupların, milli azlıqların ortaq dəyəri Azərbaycandır. Biz İkinci Qarabağ müharibəsində bunun şahidi olduq. Azərbaycanda yaşayan bütün millətlərin nümayəndələri ölkəmizin ərazi bütövlüyü və suverenliyi uğrunda canlarını qurban verdilər, şəhid, qazi oldular. Qarabağın erməni sakinləri də Azərbaycanda yaşayan digər millətlər kimi Azərbaycan vətəndaşlarıdır. Azərbaycanın digər vətəndaşları kimi Azərbaycan Respublikasının Konstitusiyasından irəli gələn hüquqi təminatlar sözsüz ki, onlara da şamil olunacaqdır.
İnanırıq ki, BMT-nin missiyası da Azərbaycanın humanizm siyasətini yerində düzgün qiymətləndirəcək və ədalətli rəy bildirəcək".

Telegramda izləyin

instagramda izləyin