"Korrupsiya yuvası Avropa Parlamenti bütövlükdə gündəmini Azərbaycana həsr edib" - Bəhruz Məhərrəmov

"Korrupsiya yuvası Avropa Parlamenti son bir aya yaxın dövrdə bütövlükdə gündəmini Azərbaycana həsr edib. Nəyə görə, çünki, Azərbaycan beynəlxlaq hüququn aliliyini təmin edib. Separatizmlə mübarizədə effektiv nəticə ilə cənab İlham Əliyev bir çoxlarına ustad dərsi keçib".

Bu sözləri Milli Məclisin deputatı Bəhruz Məhərrəmov Avropa Parlamentinin Azərbaycan əleyhinə qəbul etdiyi qətnamə ilə bağlı Sonxeber.az-a açıqlamasında bildirib.

Deputat qeyd edib ki, Puçtemonun həbsini ayaqüstə alqışlayan riyakarlar bu gün Qarabağdakı qondarma rejimin "liderlərinin" həbsindən narahatlıq ifadə edir.

"Konstitusiyanın 10-cu maddəsinə əsasən, Azərbaycan Respublikası başqa dövlətlərlə münasibətlərini hamılıqla qəbul edilmiş beynəlxalq hüquq normalarında nəzərdə tutulan prinsiplər əsasında qurur. Amma yalnız son 1 aylıq periodu təhlil etsək, Fransa və Avropa İttifaqının Azərbaycana münasibətdə beynəlxalq hüququn prinsiplərinə necə zidd və açıq formada qərəzli davranışlar sərgilədiyinin şahidiyik. 30 il maskalanmağa çalışan Fransa bu gün açıq formada özünü erməni dövləti kimi, aparır. Korrupsiya yuvası Avropa Parlamenti son bir aya yaxın dövrdə bütövlükdə gündəmini Azərbaycana həsr edib. Nəyə görə, çünki, Azərbaycan beynəlxlaq hüququn aliliyini təmin edib. Separatizmlə mübarizədə effektiv nəticə ilə cənab İlham Əliyev bir çoxlarına ustad dərsi keçib. Puçtemonun həbsini ayaqüstə alqışlayan riyakarlar bu gün Qarabağdakı qondarma rejimin "liderlərinin" həbsindən narahatlıq ifadə edir " ,- deyə o vurğulayıb.

Bəhruz Məhərrəmov bildirib ki, Ermənistan üzünü bölgəyə tutmalı, xüsusən Azərbaycan-Türkiyə tandemindən maksimum yararlanmağa çalışmalıdır:

"Bizim mövqeyimiz aydındır, müdafiə olunmağa da, haqqımızı söküb almağa da gücümüz var. Bu prosesdə əsas Ermənistan diqqətli olmalıdır. Ermənistan ilk növbədə məhz Azərbaycanla əməkdaşlıq nəticəsində düşdüyü dalandan çıxa biləcəyini anlamalıdır. Ötən il Zəfər Günündə cənab Prezidentin Şuşadan bəyan etdiyi kimi, Ermənistan başa düşməlidir ki, min kilometrlərlə kənardan heç kim gəlib onların yerinə döyüşməyəcək. Ermənistan anlamalıdır ki, Fransa, yaxud Avropa İttifaqı üçün heç bir erməninin taleyi maraqlı deyil, əksinə onlar indiki məqamda ermənilərdən istifadə edərək bölgədə maraqlarını təmin etmək, niyyətindədirlər. Bu isə kiçik dalan dövləti olan Ermənistan üçün sui-qəsd deməkdir. Ermənistan üzünü bölgəyə tutmalı, xüsusən Azərbaycan-Türkiyə tandemindən maksimum yararlanmağa çalışmalıdır. Xüsusən artıq "Qarabağ" adlı bir problem qalmadığı, bunu etməyin çox daha asan olduğu bir şəraitdə.
Azərbaycan bir reallıq yaradıb, dəyişməz reallıq. İndi Avropa Parlamenti bizə sanksiya tətbiq etdi nə fərq edər, yaxud etmədi nə fərq edər! Biz artıq güclüyük və bir az daha dərindən təhlil edilsə, başa düşmək çətin deyil kim-kimdən daha çox asılıdır və kim kimə möhtacır".

O əlavə edib ki, Qafqaz əsrlərdir möhtac qaldığı sülhə məhz Prezident İlham Əliyevin sayəsində heç vaxt olmadığı qədər yaxındır:

"Möhtərəm Prezident Bakıda 74-cü Beynəlxalq Astronavtika Konqresinin açılış mərasimindəki tarixi çıxışında bəyan etdi ki, "İndi Qafqazda sülh üçün vaxt yetişib".

Həqiqətən bu gün Qafqaz əsrlərdir möhtac qaldığı sülhə məhz Prezident İlham Əliyevin sayəsində heç vaxt olmadığı qədər yaxındır.

Bu gün Azərbaycan və Ermənistan arasında sülh müqaviləsinin imzalanması üçün faktiki olaraq heç bir prinsipial maneə qalmayıb.
Biz sülhün bir addımlığındayıq. Amma görünən odur ki, Avropa Parlamenti, Fransa, Almaniya kimi subyektlər bu bir addımlıq məsafəyə israrla burunlarını soxmaq istəyirlər. Əlbəttə bizim üçün onların nə sözlərinin, nə özlərinin heç bir qiyməti yoxdur. Amma eyni zamanda bilsinlər ki, Avroparlamentdə şərəfini satmış siyasətçiləri kim, necə və neçəyə danışdırır bizə bəllidir.
Ona görə də möhtərəm prezidentin dediyi kimi hər kəs öz işi ilə məşğul olsun və bizim səbrimizlə oynamasınlar. Hər bir halda itirən biz olmayacağıq. Heç kim möhtərəm Prezidentin iradəsinə təsir edə bilməz. Vətən müharibəsində bizə məğlub olanlar bundan sonra mübarizədə israrlı olacaqlarsa, məğlubiyyətlər seriyasına hazır olmalıdırlar".

Şəbnəm Lətifi

Telegramda izləyin