Xocalıda 9 yaşında əsir düşmüş, Nərgiz:"Gözümün qabağında atamın dişlərini çəkdilər" VİDEO/Müsahibə

Xocalıda əsir düşən, 9 yaşlı Nərgiz Mahmudovanın artıq 40 yaşı var.

BiG.AZ xəbər verir ki, o, ailəsi ilə birgə erməni girovluğunda başına gələn müsibətləri danışıb

"Xocalı dörd tərəfdən mühasirəyə alınmışdır.. Mənim 9 yaşım vardı. Bacımın əlindən tutdum. Atamın, anamın, bacılarımın, qardaşlarımın - hamımızın ayağı buz bağlamışdı. Mən gedə bilmirdim. Məni bacım, qardaşım qucaqlarında daşıyırdı. Uzaqdan Ağdam görünürdü. Amma meşədə yolu axtarıb tapa bilmirdik. Atamın bacısı, qardaşımın 8 aylıq həyat yoldaşı burada güllələndi. Ağ qar qıpqırmızı olmuşdu...

Yolu səhv saldıqdan sonra ermənilərlə qarşılaşdıq. Onlar bizi tövləyə apardılar. Bizim ən əzablı günlərimiz başladı. Kişiləri, cavan oğlanları gözümüzün qabağında döyürdülər. Mənim atamı orada döydülər, qabırğalarını sındırdılar, dişlərini çəkdilər. Onlar uşağa, qadına heç kimə baxmırdı. Hamını döyürdülər Bir həftəyə yaxın biz əsirlikdə qaldıq.

Əsirlikdən qurtulandan sonra, o çəkilişi Çingiz Mustafayev - Milli Qəhrəmanımız çəkmişdi. O videoya əvvəl heç baxa bilmirdim. İndi isə hissə hissə baxıram. Erməni bizdə sağalmaz yara qoydu. Bu gün mənim 40 yaşım var amma o qorxuyu adlada bilməmişəm".

Qeyd edək ki, 1992-ci il fevralın 25-dən 26-na keçən gecə erməni silahlı dəstələri keçmiş sovet ordusunun Xankəndi şəhərində yerləşən 366-cı alayının iştirakı ilə Xocalı şəhərini yerlə-yeksan etdi. Erməni təcavüzkarlarının Azərbaycan xalqına qarşı törətdiyi növbəti kütləvi qırğın nəticəsində 613 nəfər, o cümlədən 106 qadın, 63 uşaq, 70 qoca xüsusi amansızlıqla qətlə yetirildi, 1275 dinc sakin əsir götürüldü, 150 nəfərin taleyi isə hələ də məlum deyil. Bu soyqırımı aktı nəticəsində 8 ailə tamamilə məhv edildi, 25 uşaq hər iki valideynini, 130 uşaq isə valideynlərindən birini itirdi.

Telegramda izləyin