"Bu gün 18 Oktyabr Müstəqilliyimizin Bərpası Günüdür" - DEPUTAT

"Bu gün 18 Oktyabr Müstəqilliyimizin Bərpası Günüdür. Bu əlamətdar təqvimdə başda ölkə rəhbərliyi olmaqla Azərbaycan xalqını təbrik edir, ulu öndərin bizə bəxş etdiyi siyasi müstəqilliyimizin, cənab İlham Əliyevin təmin etdiyi iqtisadi müstəqilliyimizin əbədi olmasını arzulayırıq".

Bu sözləri Sonxeber.az-a Milli Məclisin deputatı Bəhruz Məhərrəmov deyib.

O bildirib ki, biz müstəqilliyi SSRİ-nin dağılması fonunda İttifaq dövlətlərinin çoxundan sonra bərpa etmişik. Hətta Rusiya özü dövlət suverenliyi haqqında Konstitusiya Aktını bizdən qabaq qəbul etdiyi halda Azərbaycanda bu məsələni referenduma çıxarmağı qərara aldılar.
"O zaman proseslərdə aşkar milli mövqe yalnız Heydər Əliyev tərəfindən ortaya qoyuldu. Naxçıvanda referendum ümumiyyətlə rədd edildi. Heydər Əliyev müstəqilliyini 1991-ci ilin martında elan edən Litvadan 4 ay əvvəl, hələ 1990-cı il noyabrın 17-də Naxçıvan Muxtar Sovet Sosialist Respublikasının adından "Sovet Sosialist" sözlərini çıxarmağa nail oldu, Cümhuriyyətin üçrəngli bayrağı Naxçıvanda rəsmi bayraq kimi qəbul edildi. Budur müstəqilliyə gedən yol. 18 oktyabr sadəcə bu proseslərin uzun və yersiz çərk-çevirdən sonra gecikmiş rəsmiləşməsidir.
Müstəqillik bərpa edildikən sonra 18 oktyabrı Müstəqillik Günü kimi qeyd etməyə başladılar ki, bu da aşkar formada təxribat idi. Biz əgər Müstəqillik Aktında özümüzü xalq Cümhuriyyətinin varisi hesab edirdiksə, deməli əvvəllər müstəqil olmuşuq, 18 oktyabr isə müstəqilliyin 70 ildən sonra bərpa olunduğu gündür. Bu ideoloji təxribatın da qarşısını məhz cənab İlham Əliyev aldı və tarixi ədalət bərpa olundu.
Bu gün Azərbaycan sözün əsl mənasında müstəqil dövlətdir, həm də öz Zəfəri ilə işğala, separatizmə son qoymaqla, cənab İlham Əliyevin rəhbərliyi altında tarixin heç bir dövründə olmadığı qədər güclüdür".
AYSEL ƏKBƏR

Telegramda izləyin