"Fransa ölkəmizə qarşı tutduğu qərəzli mövqeyi dəyişməsə Azərbaycan bu ölkə ilə münasibətlərinə yenidən baxmalı olacaq" - DEPUTAT

"Fransa və Ermənistan arasında imzalanan hərbi əməkdaşlığın məqsədi Cənubi Qafqazda vəziyyəti gərginləşdirməkdir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, 44 günük Vətən müharibəsində əldə etdiyimiz möhtəşəm zəfər Fransanın əsil simasını ortaya çıxardı:

"30 il ərzində Fransa gizli şəkildə Ermənistana dəstək olub. 44 günlük Vətən müharibəsi və ondan sonrakı dövrdə Fransa əsil üzünü büruzə verdi. ATƏT-in Minsk qrupunun həmsədr dövləti kimi neytral mövqe tutmalı olan Fransa açıq-aşkar işğalçıya dəstək verərək, Ermənistanın xalqımıza qarşı törətdiyi terror aktlarına, soyqırımlarına və təxribatlarına haqq qazandırdı. Fransa ildir ki, Azərbaycanın öz gücünə ərazi bütövlüyünü bərpa etməsi ilə barışa bilmir. Müxtəlif yollarla Azərbaycan-Ermənistan arasında sülh müqaviləsinin imzalanmasına maneə olmağa çalışır".

Deputat vurğulayıb ki, Fransa ölkəmizə qarşı tutduğu qərəzli mövqeyi dəyişməsə Azərbaycan bu ölkə ilə münasibətlərinə yenidən baxmalı olacaq:

"Fransa və Ermənistanın digər havadarları anlamalıdırlar ki, Azərbaycan BMT Təhlükəsizlik Şurasının 4 qətnaməsini yerinə yetirərək öz ərazi bütövlüyünü bərpa edib. Soydaşlarımız zorla çıxarıldıqları dədə-baba yurdlarına geri qayıdır. Fransanın və Ermənistanın digər havadararının qəbul etdiyi sərsəm qətnamələr, verdiyi açıqlamalar, regionu gərginləşdirməyə yönəlmiş addımlar bizi yolumuzdan döndərə bilməyəcək.Onlar istəsə də, istəməsə də Zəngəzur dəhlizi tezliklə açılacaq və Ermənistan Azərbaycanın şərtləri ilə hazırlanan sülh müqaviləsini imzayacaq".

Telegramda izləyin