"Nəticəsi əvvəlcədən bəlli olan və düşmənin mənafeyinə xidmət edən danışıqlar formatı bizi qane edə bilməz" - DEPUTAT

Azərbaycan Prezident İlham Əliyev, Ermənistanın Baş naziri Nikol Paşinyan və Avropa İttifaqı Şurasının prezidenti Şarl Mişel arasında oktyabrın sonunadək Brüsseldə keçirilməsi planlaşdırılan görüşdən imtina edib.

Bununla bağlı Sonxeber.az-a danışan deputat Nəsib Məhəməliyev bildirib ki, rəsmi Bakı Brüssel görüşündən heç vaxt imtina etməmişdir:

"Məlumdur ki, Avropa İttifaqı Şurasının prezidenti Şarl Mişelin vasitəçiliyi ilə, Prezident İlham Əliyevlə baş nazir Paşinyan arasında dörd görüş keçirilmişdir. Danışıqlar kifayət qədər konstruktiv ruhda aparılmış və tərəflər arasında əsas məsələlərlə bağlı razılıqlar əldə olunmuşdur. Lakin, Fransa prezidenti Makronun kobud müdaxiləsi sülh danışıqlarına zərbə vurdu. Daha sonra Makronun təhriki ilə Almaniya kansleri Şoltsun da prosesə qatılması, birtərəfli ermənipərəst mövqeləri və yeni iddiaları Azərbaycanı qane edə bilməzdi.

Yeni yaradılmış Brüssel formatının əsas məqsədi odur ki, qeyd-şərtsiz Qarabağı tərk etmiş ermənilər qaytarılmalı, bölgəyə beynəlxalq müşahidəçilər yerləşdirilməli, Azərbaycan xalqına qarşı ağır cinayətlər törətmiş şəxslər azad olunmalı və s. Onların canfəşanlığının kökündə duran əsas amil odur ki, Qarabağda 30 ildən artıq mövcud olmuş "boz zona" qalmalıdır. Təbii ki, nəticəsi əvvəlcədən bəlli olan və birmənalı şəkildə düşmənin mənafeyinə xidmət edən danışıqlar formatı bizi qane edə bilməz".

Telegramda izləyin