"Terrorçuları müdafiə edən dairələr açıq-aşkar soyqırımı və separatçılığı da dəstəkləmiş olurlar" - Deputat

"Erməni lobbisinin təsiri altında olan bəzi təşkilatlar növbəti anti-Azərbaycan kompaniyasına başlayıb".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, uşaq, qoca, qadın və cavan demədən soydaşlarımızı vəhşicəsinə öldürən, hərbi cinayətlərdə ittiham olunaraq həbs edilən erməni separatçılar "siyasi məhbus" elan edilib:

"Ölkəmizə qarşı başlanılan bu iyrənc kompaniyaya Fransa başçılıq edir. Hətta onlar özləri üçün biabırçı siyahı da hazırlayıblar. 55 nəfərdən ibarət olan siyahıda 44 günlük müharibə zamanı Gəncə və digər şəhərlərimizin bombalanması əmrini verən Araik Arutyunyan, qondarma quruma rəhbərlik etmiş Bako Saakyan, Arkadi Qukasyan və əli soydaşlarımızın qanına bulaşmış digər erməni qatillərin də adı var. Adları siyahıda olan şəxslər ölkəmizə və azərbaycanlılara qarşı açıq-aşkar müxtəlif cinayətlər törətmiş şəxslərdir. Qondarma siyahıda adı olan şəxslərin törətdiyi cinayətlər əməlləri faktlarla sübuta yetirilib".

Deputat vurğulayıb ki, bu gün terrorçuların müdafiəçisinə çevrilən, insan hüquq və azadlıqlarının təminatından dəm vuran, əslində isə ikili standart mövqeyindən çıxış edən beynəlxalq təşkilatlar 30 il ərzində ermənilərin azərbaycanlılara qarşı törədiyi soyqırımlara və cinayətlərə qarşı lal və kor olublar

"Terrorçuları və cinayətkarları müdafiə edənlər əslində dolayı yolla soyqırımı və separatçılığı da dəstəkləmiş olurlar. Bu qüvvələr müxtəlif oyunlarla regionda vəziyyəti yenidən gərginləşdirməyə çalışırlar. Ermənistan və havadarlarının regionda vəzyyətin gərginləşməsinə hesablanan oyunu Azərbaycan növbəti qələbəsi ilə nətilənəcək".

Telegramda izləyin