"Kredit faizləri nə qədər yüksəkdirsə, deməli banklar..." - İQTİSADÇI AÇIQLADI

"Bölgələrdə kredit faizlərinin Bakıdan daha çox olması risklərlə bağlıdır. Kredit faizləri nə qədər yüksəkdirsə, deməli banklar o krediti daha riskli qiymətləndirirlər. Regionlarda kredit götürmək üçün qoyulan girovlar riskli aktivlər sayılır. Banklar regionlarda olan daşınmaz əmlakı, torpağı girov kimi qəbul edə biləcəyi vətəndaşın təqdim etdiyi əmlakı riskli sayır. Çünki likvidliyi aşağıdır. Vaxtında sata bilmir. Regionlarda iqtisadi aktivlik zəifdir. Ona görə də regionlarda kredit götürmək istəyən vətəndaşlara onlara daha yüksək faizlə kredit təklif edirlər ki, o riskləri sığortalasınlar".

Bu sözləri Sonxeber.az-a açıqlamasında iqtisadçı ekspert Natiq Cəfərli deyib. Onun sözlərinə görə, 5 nəfərə yüksək faizlə kredit verirlər ki, onların birində problem yaransa, həmin 4 nəfərin ödədiyi yüksək faizlər o 1 nəfərin problemini bağlaya bilsin:

"Yəni bunun sadə dildə izahı bundan ibarətdir. Buna görə də regionlarda kredit faizlərinin yüksək olması bununla izah oluna bilər. Bu da heç yaxşı bir hal deyil. Regionlarımız kənd təsərrüfatı ilə məşğul olmalıdırlar. Aqrar sahədə uzunmüddətli və çox aşağı faizli kreditlər olmalıdır ki, istehsal sahələri və emal müəssisələri yaransın. Fermer daha çox texnika almaqda və əlverişli suvarma sistemi tətbiq etməkdə maraqlı olmalıdır. Bütün bunlar isə uzunmüddətli və aşağı faizli kreditlərə bağlıdır. Onlarda olmayanda təbii ki, Azərbaycanda aqrar sektorda problemli məsələlər davam edir. Bəzi hallarda görürük ki, ənənəvi sahələrdə istehsal həcmlərinin azalmasını müşahidə edirik".

Sevda Səfərova

Telegramda izləyin