Açıq havada satılan paltarlar orqanizmdə hansı fəsadlar yaradır? - AÇIQLAMA

Açıq havada, qablaşdırılmamış şəkildə satılan paltarlar müxtəlif xəstəliklərin yayılmasına səbəb olur. Xüsusilə bu paltarların bir neçə dəfə yuyulma zamanı cırıldığının və köhnəldiyinin şahidi oluruq. Bu o deməkdir ki, ucuz geyimlər çox vaxt keyfiyyətsiz olur. Eyni zamanda həmin paltarlar və köynəklər üçün istifadə olunan boyalar sağlamlıq üçün bir çox risklər daşıyır. Açıq havada satılan geyimlər orqanizmdə hansı xəstəliklər yaradır?

Mövzu ilə bağlı həkim-infeksionist İnfeksionist-hepatoloq dr. Mərdan Əliyev Sonxeber.az-a bildirib ki, tozlu olan və açıq vitrində satılan paltarların istifadə olunması düzgün deyil:

"Ümumiyyətlə paltar alındıqdan sonra əksər hallarda yuyulub sonradan geyinilməsi tövsiyə olunur. Açıq havada satılan paltarlar müxtəlif dəri xəstəliklərinin yaranmasına səbəb ola bilər. Allergik-dermatit xəstəliklərinin əmələ gəlməsi yüksəkdir. Ümumiyyətlə keyfiyyətsiz paltarların geyinilməsi düzgün deyil. Texnologiya çox inkişaf edib. Biz bilmirik ki, o parçaların mənbəyi nədir. Harada və nədən hazırlanır bilmirik. Bununla yanaşı həmin paltarları maya dəyərindən aşağı salmaqla alıcıların sayıda artır. Daha keyfiyyətli parçalar bahalı olur. Buna görə də, keyfiyyətsiz parçaların istifadə olunması, xüsusilə uşaqlara geyindirilməsi ciddi fəsadlara yol aça bilər. Bu baxımdan paltar alarkən diqqətli olmaq lazımdır. Hətta bəzən çanta və digər ləvazimatlar alırıq. Bu məhsulların üzərindən xoşagəlməz qoxu gəlir. Bu da onu göstərir ki, həmin məhsullar düzgün materialdan hazırlanmayıb. Belə hallara fikir vermək indiki zamanda mütləqdir".

Sevda Səfərova

Telegramda izləyin