Hidayət Orucovun qızı ilə nazirlik arasında qalmaqal: Hansı qanunu pozub?

Əmək və Əhalinin Sosial Müdafiəsi Nazirliyi ilə Bakı Dövlət Universitetinin nəzdində İqtisadiyyat və Humanitar Kollecinin direktoru Səhər Orucova arasında qalmaqal yaranıb.

Qaynarinfo xəbər verir ki, nazirlik Səhər Orucovanı İnzibati Xətalar Məcəlləsinin 192.4-cü maddəsi ilə inzibati qaydada cəzalandırıb.

192.4-cü maddə işçinin əmək və məzuniyyət haqlarının, ezamiyyə xərclərinin, əmək qanunvericiliyində nəzərdə tutulmuş müavinət və digər ödənişlərin hesablanmasında və ödənilməsində, riyazi hesablamalar nəticəsində yol verilən nöqsanlar istisna olmaqla, qanun pozuntularına yol verilməsi ilə bağlıdır.

Bu maddəyə görə vəzifəli şəxslər 700 manatdan 1500 manatadək məbləğdə cərimə edilir.

Səhər Orucova nazirliyin bu qərarını qanunsuz hesab hesab etdiyinə görə məhkəməyə şikayət edib. İşə Abşeron Rayon Məhkəməsində hakim Sevinc Quliyevanın sədrliyi ilə baxılır. Yanvarın 15-də iş üzrə növbəti proses keçiriləcək.

Səhər Orucova Dini Qurumlarla İş Üzrə Dövlət Komitəsinin keçmiş sədri, 2012-2021-ci illərdə Azərbaycanın Qırğıstanda səfiri olmuş Hidayət Orucovun qızıdır.

Professor Səhər Orucova həm də "Folklorşünaslıq" jurnalının təsisçisidir.

Telegramda izləyin