Qarabağda yaşayan ermənilər üçün ayrıca təhsil müəssisləri AÇILACAQ? - AÇIQLAMA

Böyük qayıdış planına əsasən Qarabağ iqtisadi rayonunda bərpa-quruculuq işləri davam edir. Son zamanlarda ən çox verilən suallardan biri də Qarabağda yaşan erməni uşaqlarının təhsil məsələlərinin necə tənzimlənəcəyidir. Qarabağda yaşayan erməni uşaqları üçün ayrıca təhsil müəssisələri açıla bilər?

Bununla bağlı təhsil məsələləri üzrə ekspert Kamran Əsədov Sonxeber.az-a bildirib ki, Azərbaycan Respublikasının Konstitusiyasına əsasən və təhsil haqqında qanuna görə Azərbaycanda bütün azsaylı xalqlar öz ana dillərində təhsil almaq hüququna malikdirlər:

"O cümlədən tərəfdaş çıxdığımız beynəlxalq konvensiyalar hər kəsin Azərbaycan Respublikası ərazisində və vətəndaşlığı olan yaxud hətta olmayan, müvəqqəti Azərbaycan ərazisində yaşayan, qaçqın, məcburi köçkün statusuna malik hər kəsin təhsil hüququnu təmin edir. Azərbaycan demokratik ölkədir. Azərbaycan Respublikasının bütün vətəndaşları etnik mənsubiyyətindən asılı olmayaraq, təhsil almaq hüququ almaq onların üçün təmin olunur. Bu dövlətin öhdəliyidir. Azərbaycanda digər azsaylı xalqlar ilə erməniləri bərabərləşdirə bilmək ehtimalımız yoxdur. Yəni bunu etiraf etmək lazımdır. Qanun qarşısında hər kəs bərabərdir. Amma burada qanunla yanaşı emosiyalarımızda var".

Kamran Əsədov söyləyib ki, bu emosiyalar yaxşı şeylər vəd etməyə bilər. Biz əgər birgə yaşayışı qarşımıza hədəf qoymuşuqsa, Azərbaycan Respublikasının bütün vətəndaşları bərabər yaşamalıdır:

"Bununla bağlı bir sıra ölkələrin təcrübələri var. Məsələn qardaş ölkə Türkiyədə ermənilər üçün təhsil almaq hüququ təmin olunub. Ermənilər etnik azlıqlardır. Onlar üçün ayrıca məktəb nəzərdə tutulmur. Ümumiyyətlə belə bir məsələ müzakirə predmetidə deyil. Azərbaycan Respublikasında vətəndaşlar birgə təhsil alırlar. Onlar ayrıca məktəbdə təhsil almayacaqlar. Çünki biz inteqrasiyadan danışırıqsa, gələcəkdə hər iki xalqın yaxınlaşmasını hədəf qoymuşuqsa onlar birgə azərbaycanlılar ilə birlikdə oxuyacaqlar. Azərbaycanın bu barədə Kifayət qədər təcrübəsi var. Əlbəttə tarix ərzində, xüsusilə son 30 il ərzində Qarabağ Azərbaycana çox böyük itkilər hesabına başa gəlib. O cümlədən həmin məktəblərdə ermənilər ilə bərabər Azərbaycanın ərazi bütövlüyündə gedən döyüşlərdə şəhid və əlil olmuş şəxslərin övladları da təhsil alacaq. Biz düşmənçilik mövqeyində dövlətçilik siyasəti həyata keçirmirik".

Ekspertin sözlərinə görə, Azərbaycan öz gücünü, tarixi ədalətini müharibə meydanında göstərdi. Azərbaycan öz vətəndaşına qarşı hər hansı bir düşmənçilik siyasəti həyata keçirmir. Qarabağda yaşayan azsaylı erməni nümayəndələri azərbaycanlılar ilə birgə təhsil alacaqlar. Azərbaycan ilk vaxtlarda onların təhlükəsizliyini öz öhdəliyinə götürüb:

"Bu gün Azərbaycanda talış, ləzgi, avar kimi azsaylı xalqlar necə təhsil ala bilirlərsə, ermənilərə də o şəraiti yaradacaqlar. Ermənilərə qarşı hər hansı bir etnik təmizləmə siyasəti həyata keçirilməyib. Quruculuq işləri davam edir. Azərbaycanın mövqeyi bilavasitə belədir. Hər bir şəxs burada etnik mənsubiyyətindən asılı olmayaraq təhsil alacaqlar. Təhsil Azərbaycan dilində olacaq və ölkə ərazisində yaşayan hər bir şəxs, müxtəlif xalqların nümayəndələri Azərbaycan dilində təhsil alırlar. O cümlədən onların konstitusion hüquqlarından biri ermənilərə öz ana dillərində təhsil almaq şəraiti yaradılacaq. Təbii ki, onların gələcəkdə bütün dövlət strukturlarında işləmək imkanlarıda yaradılacaq. Bunlar baş verəcəkdir. Cənab prezident deyib ki, onlar Azərbaycan Respublikasının vətəndaşlarıdır. Onlar üçün ayrıca məktəb yaxud erməni dilində məktəb olmayacaq. Yalnız Azərbaycan Respublikasının Konstitusiyası öz vətəndaşlarına hansı hüquqları verir yaxud tanıyırsa ermənilər də o hüquqlara malik olacaqlar".

Sevda Səfərova

Telegramda izləyin