TikTok-da insanları "ovlayan" FALÇILAR: 12 il həbs oluna bilər

Son zamanlar sosial şəbəkələrdə, xüsusi ilə TikTok-da özlərini falçı, baxıcı kimi təqdim edən şəxslərin sayı artıb. "Tanrı vergisi", "dil-ağız bağlamaq", "cadu təmizlənməsi", "bəxt açma" kimi xidmətlər göstərdiyini deyən şəxslərə inananlar da az deyil. Hətta bu yolla onlar xeyli miqdarda pul da qazanırlar. Sosial şəbəkələrdə insanların inamından istifadə edərək, onların pullarını mənimsəyən şəxslər qanun qarşısında məsuliyyət daşımır?

Məsələ ilə bağlı hüquqşünas Ələsgər Məmmədli Sonxeber.az-a açıqlama verib.

Hüquqşünas özlərini baxıcı, falçı kimi təqdim edərək sosial şəbəkələ insanlardan pul yığan şəxslər də dələduzluq sayıldığını bildirib:

"Hansısa formada insanları aldadıb onlardan pul toplamaq xırda dələduzluq sayılır. Özlərini "Görücü", "falçı" kimi təqdim edərək sosial şəbəkələ insanlardan pul yığan şəxslər də dələduzluq sayıla bilər. Dələduzluq böyük məbləğdədirsə, onun məsuliyyətidə bir o qədər yüksəkdir. İnsanların etimadından istifadə edərək, onların pullarının mənimsəyən şəxslər Azərbaycan Respublikasının Cinayət Məcəlləsinin 178-ci maddəsinin 1,2,3 bəndlərinə əsasən,12 il müddətində azadlıqdan məhrum edilə bilər. Amma bu hal könüllü şəkildə baş verirsə, bu zaman hüquqi məsuliyyət olmur. Çünki, insanlar öz vəsaitini istədikləri kimi xərcləyə bilərlər.
Əgər həqiqətən insanların etimadından sui-istifadə olunaraq, dələduzluq məqsədi ilə istifadə edilirsə və insanlar zərər çəkirsə bu məsələyə baxıla bilər".

Hüquqşünas son olaraq sosial şəbəkə istifadəçilərinin dələduzlarla münasibətdə diqqətli olmasını tövsiyə edib. Bu qədər bəsit şeylərə aldanmamalı olduqlarını bildirdi.

Gülcahan Məmmədova

Telegramda izləyin