Hərbçilər kommunal xidmətlərdən azad edilə bilər? - ARAŞDIRMA

Bildiyimiz kimi, keçmiş məcburi köçkünlərimiz kommunal xərclərdən azad idilər. Bir zamanlar məcburi köçkünlərə kommunal xidmət ilə bağlı edilən güzəştlər hərbçilərə tətbiq edilməsi təklif olunur. Bununla bağlı, Milli Məclisin deputatı Cavanşir Paşazadə və hərbi ekspert Emin Həsənli Sonxeber.az-a açıqlama verib.

Deputat Cavanşir Paşazadə bildirib ki, 44 günlük Vətən Müharibəsində və 2023-cü ilin antiterror tədbirləri zamanı Ali Baş Komandan İlham Əliyevin rəhbərliyi ilə Azərbaycanın Müzəffər Ordusu 30 illik işğala son qoyaraq ərazi bütövlüyümüzü bərpa etdi:

"Hərbiçilərimiz mərdliyi ilə 44 günlük Vətən Müharibəsində və 2023-cü ilin antiterror tədbirləri zamanı əsil qəhrəmanlıq dastanı yazdılar. Bu gün bütün dünya Azərbaycan əsgərinin igidliyindən və qəhrəmanlığından danışır. 44 günlük Vətən Müharibəsində Azərbaycanın mərd oğulları qanları və canları ilə tarix yazdılar. Xüsusilə də Şuşa döyüşlərində. Ali Baş Komandan İlham Əliyev hər zaman cəmiyyətdə bütün kateqoriyadan olan təbəqələrə, o cümlədən hərbi qulluqçulara diqqət və qayğısını əsirgəmiyib, bu gün də əsirgəmir. Bu gün dünyanın aparıcı dövlətlərinin Silahlı Qüvvələri ilə rəqabət aparmaq gücündə olan ordumuz gündən-günə inkişaf edir və güclənir. 44 günlük Vətən Müharibəsində əldə etdiyimiz möhtəşəm zəfər və 2023-cü ilin antiterror tədbirləri, hər il keçirilən hərbi paradlar bu inkişafın, tərəqqinin bariz sübutudur. Bu gün bütün hərbi qulluqçuların maddi rifah halı yüksəlib. Cənab prezident İlham Əliyevin bu sahədə apardığı uğurlu islahatların nəticəsidir xalqımız doğma torpaqlarına qovuşdu. Bugünkü möhtəşəm zəfərimizi Ali Baş Komandan İlham Əliyevə və Azərbaycanın Müzəffər Ordusuna borcluyuq.

Qaldı ki, Qarabağ bölgəsində çalışan hərbiçilərə kommunal xərclərlə bağlı güzəştlərin edilməsinə.Hazırda bu məsələ müzakirə olunmur. Amma tək Qarabağ bölgəsində deyil, bütün hərbiçilərə kommunal xərclərlə bağlı müəyyən güzəştlərin edilməsi məsələsinə baxıla bilər".

Hərbi ekspert Emin Həsənlinin sözlərinə görə, hərbçilərə güzəştlər edilməsi hər zaman dövlətin ən əsas siyasətlərindən biridir. Hərbi sahələrə xüsusi diqqət və qayğı göstərilməsi, onların sağlamlıq məsələsi və mənzil şəraiti, asudə vaxtının təşkili, övladlarının təhsil alması məsələsi hər zaman dövlətin diqqət mərkəzindədir:

"Keçən il cənab prezident ard-arda sərəncamlar verdi. Hərbi ali məktəblərə qəbul olanlar, oxuyanların ailələrinin bəlli miqdarda pul vəsaiti ilə təmin edilməsi də hərbi peşəyə marağı artıracaq. Dövlətimiz hərbçilərə, müharibə veteranlarına, şəhid ailələrinə, müharibə əlillərinə bir sıra güzəştlər nəzərdə tutub. Bu güzəştlərdə ildən ilə artırılır. Bu istiqamətdə sistemli ardıcıl işlər həyata keçirilir. Bu məsələlərdə gündəmdən keçirilir. Ancaq kommunal xərclər ilə bağlı siyasət başqadır. Burada dövlət hərbçilərin əməkhaqqını artırır. Eyni zamanda əməkhaqqını ona görə artırır ki, ailə büdcəsini yaxşı dolandıra bilsin. Kommunal xərclər ilə bağlı müəyyən güzəştlər var idi. Bu güzəştlər şəhid ailələrinə, veteranlara və müharibə əlillərinə tətbiq edilirdi. Sonra o prezident təqaüdü ilə əvəzləndi ki, həmin pulla kommunal xərclər ödənilsin".

Ekspertin sözlərinə görə, bu gün müxtəlif fikir var ki, bir veteranın tək özünə verilən pul kommunal xərclərə ödənilir. İşıq, qaz, internet xərcləri, hətta nəqliyyat vasitələrinin pulu da hesablanırdı:

"Nəqliyyat vasitələri ilə bağlı müəyyən güzəştlər var idi. Sonradan nəzərə alındı ki, burada pul kompensasiyası olsun. Kompensasiyanın artırılmasına hər zaman dövlət hər zaman üstünlük verir. Belə də davam etmək lazımdır. Kommunal xərclərdən azad edilməkdənsə ona verilən pul vəsaitinin artırılması diqqətdə tutula bilər. Bir bölgədə xidmət edən hərbçini kommunal xərclərdən azad edib, digər bölgədə xidmət edən hərbçinin bu xərclərdən azad edilməməsi doğru deyil. Zamanla döyüş bölgəsində xidmət edən hərbçilərə əməkhaqqısı iki qat idi. Dağ və yüksək relyefli ərazilərdə xidmət edənlərə bəlli bir faiz üzərinə gəlir. Bunlar zəruridir və artırılması da lazımdır. Ancaq kommunal xərclər ilə bağlı məsələ fərqli yanaşmadır. Hesab edirəm ki, bu tip məsələlərdə hərbçilərə verilən vəsaitin artırılma məsələlərinə daha çox diqqət edilsə daha yaxşı olar. Bu istiqamətdə də zaman-zaman addımlar atılır".

Sevda Səfərova

Telegramda izləyin