Kişi müəllimlərin azlığı kriminala yol açır? - "Analıq instinkti maneə törədir"

"Kişi müəllimlərin say azlığı ilə bağlı dəfələrlə çağırış etmişik. Təəssüf ki, hazırda məktəblərdəki müəllimlərin 80%-ni qadınlar təşkil edir".

Bu sözləri Ölkə.Az-a açıqlamasında təhsil eksperti Elçin Əfəndi deyib. Gəncədə orta məktəbdə 11-ci sinif şagirdinin yaşıdı tərəfindən bıçaqlanması narədə danışan ekspert hesab edir ki, qadınlarda olan analıq instinkti neqativ halların qarşısının alınmasında maneə törədir:

"Xüsusilə də ibtidai sinif, Azərbaycan dili və ədəbiyyatı, xarici dil, bağça müəllimliyində və s. gender bərabərliyi pozulub və nəticə etibarilə kişi müəllimlərin sayı azalıb.
Kişilərin təhsildə olmamasının nəticəsini hazırda görürük. Təhsil müəssisələrinin rəhbərlərinin böyük əksəriyyəti də xanımlardır. Əvvəlki dövrlərdə isə kişi müəllimlərin sayının çox olması neqativ hadisələrin qarşısının alınmasına kömək edirdi. Qadın müəllimlərdə analıq instinkti baş qaldırdığı üçün bəzi məsələlərə sülh çərçivəsində yanaşırlar. Bəziləri də öz vəzifəsini itirməmək üçün buna çalışır və nəticə etibarilə də məsələ həll olunmadan qalır, neqativ hallar da ardıcıl sıralanır".

Ekspert kişi ölkəmizdə fəaliyyət göstərən kişi müəllimlərin sayının az olmasını iqtisadi amillərlə əlaqələndirib. Onun fikrincə, kişilər maaş azlığına görə, başqa sahələrə üz tutur:

"Bu məsələdə əsas problem əməkhaqqıdır. Nə qədər ki, Azərbaycan müəllimi ən azı millət vəkilləri qədər əməkhaqqı almayacaq, o vaxtadək də kişi müəllim qıtlığı olacaq. Ümumiyyətlə, istər kişi müəllim, istər qadın müəllim olsun, bu gün əməkhaqları çox aşağıdır. Əməkhaqqı və keyfiyyət bir-birindən asılıdı. Yaxşı əməkhaqqı yüksək təhsil keyfiyyəti deməkdir!"

Qeyd edək ki, 22 mindən çox kişi, 121 mindən çox isə qadın müəllim olduğu bildirilir.

Telegramda izləyin