"Azərbaycan vətəndaşlarının evlərinə qayıtmağı AŞPA-nı ciddi narahat edib" - DEPUTAT

"Məlum olduğu kimi artıq Azərbaycan AŞPA dakı nümayəndəliyinin fəaliyyətini dayandırdı. 2001-ci ildən bu günə kimi olan dövrün təcrübəsi göstərir ki, ermənipərəst qüvvələr hər zaman dövlətimizə təzyiqlər etməyə çalışıb. Lakin əldə heçnə etmədikdə isə qarayaxma kampaniyasına başlayıb".

Bunu Sonxeber.az-a danışan deputat Müşfiq Cəfərov bildirib.

Deputat qeyd edib ki, AŞPA 23 oktyabr 2023-cü il tarixində "Dağlıq Qarabağda humanitar vəziyyət" adlı qətnamə qəbul etdi:

"Həmin qətnamənin 23-cü bəndində təşkilat açıq-aşkar 19 sentyabrda baş tutan lokal xarakterli anti-terror əməliyyatlarını hərbi əməliyyatlar kimi qiymətləndirərək, "Dağlıq Qarabağın erməni əhalisinin humanitar vəziyyəti"ndən ciddi narahatçılıq ifadə edib və Azərbaycan nümayəndə heyətinin etimadnaməsini 2024-cü ilin ilk iclasında tanımamaqla hədələdi. Təbii ki, Azərbaycan dövləti də layiqli cavabını ifadə etməkdə gecikmədi.

Əslində bu təşəbbüs formal olaraq Almaniyalı deputat Frank Şvabe tərəfindən irəli sürülsə də, məsələnin arxasında məhz AŞPA rəhbərliyinin olduğu da bilinən faktdır. Elə AŞPA-nın sabiq və qüvvədə olan prezidentinin əleyhimizə səs verməsi təşkilat rəhbərliyinin mövqeyinin göstəricisidir. Lakin bu qərar elə qurumun özlüyündə də fikirayrılıqlarına səbəb oldu.Qərarın ədalətsiz olduğunu dilə gətirən deputatlarda az deyil".

Deputat vurğulayıb ki, indiyənə kimi AŞPA missiyalarının Azərbaycana səfər cəhdləri yalnız erməni məsələsi ilə bağlı olub və təşkilatın prioritet məsələsini "ermənilərin hüquqları" təşkil edib:

"AŞPA digər məsələlərlə bağlı deyil, məhz ermənilərin müdafiəsinə yönəlik "Laçın dəhlizinin blokadaya alınması"nı qınayan, eləcə də "Azərbaycan ordusunun ötən ilin sentyabrında həyata keçirdiyi və Dağlıq Qarabağın bütün erməni əhalisinin ərazisini tərk etməsi ilə nəticələnən hərbi əməliyyatı"nı pisləyən qətnamələr qəbul edib. Bir sözlə bu qurum Azərbaycanın qələbəsindən narahatlığını açıq şəkildə ifadə etdi, ədalətin təmin olunması, doğma yurdlarından didərgin düşmüş Azərbaycan vətəndaşlarının evlərinə qayıtmağı AŞPA-nı ciddi narahat edib".

Telegramda izləyin