Qətl görüntüsünün səslərini "TikTok"da istifadə edənlərin Əhməddən heç bir fərqi yoxdur - PSİXOLOQ

İnsanların zorakılığa meyilliyi, qətl hadisələrinin görüntülərə olan marağı fərqli aspektlərlə izah olunur. Sosial şəbəkələr bu görüntüləri əvvəlkindən daha əlçatan edib. Xüsusilə ölkə gündəmini zəbt edən, Əhmədin ailəsini qətlə yetirdiyi görüntülərin səslərindən "TikTok"da istifadəsi, videoların hazırlanması bunun əyani göstəricisidir. Artıq bir çox istifadəçilər bu qətl görüntülərinin səslərindən istifadə edərək məşhurlaşmağa çalışırlar. Bəs bu tip insanların psixologiyasında hansı problemlər var? Cəmiyyət arasında zorakılığa meyillilik niyə artır?

Məsələ ilə bağlı psixoloq Vəfa Əkbər Sonxeber.az-a açıqlama verib. O. bildirib ki, baş verən hadisə bərbad və qorxunc hadisədir:

"Hadisəni eşidən zaman adi insanın tükü ürpənir. O, ki qaldı həmin səslərə, çağırışlara hay verməyən, eyni zamanda bu səsləri videoda istifadə edənlərin Əhməddən heç fərqi yoxdur. Bu səsdən yararlananlara heç bir anlam vermək olmur. Görünür ki, sosial şəbəkələrdə, xüsusilə "TikTok"da bunu hazırlayanların açıq şəkildə psixologiyasında problemlər var. Həqiqətən bu insanlar müalicə almalıdırlar. Bu hadisə onu göstərdi ki, cəmiyyətimizdə xəstə ruhlu insanlar heç də az deyil. Bu platformalarda nəinki azyaşlı uşaqlar, yeniyetmələr və həssas insanlar var. Yaşından asılı olmayaraq həssas insanlar bu görüntülərdən təsirlənir. Sağlam ruhu olan insan əlbəttə ki, bu görüntülərə deyil baxmaq, səslərini belə dinləyə bilməz".

Xatırladaq ki, fevralın 13-də Bakı şəhərinin Xətai rayonunda törədilmiş qətl hadisəsi ilə əlaqədar bir sıra media subyektləri tərəfindən foto və videogörüntülər paylaşılıb, qeyd olunan görüntülərin bir qismi yetkinlik yaşına çatmayan zərərçəkmişlərin şəkillərini, digər qismi isə qətlə dair detallı görüntüləri açıq şəkildə əks etdirib.

Sevda Səfərova

Telegramda izləyin