Vətən müharibəsində iştirak edən şəxslər Rusiyada yaxud MDB ölkələrində Ermənistanın tələbi ilə həbs ediləcək? - AÇIQLAMA

Xəbər verdiyimiz kimi, dünən Ermənistanın tələbi ilə Moskvadan Bakıya qayıdarkən Domodedovo aeroportunda saxlanılan Kamil Zeynallı azadlığa buraxılıb və Bakıya qayıdıb. Ermənistan onu 29 sentyabr 2020-ci ildə yayılmış görüntülər əsasında məsuliyyətə cəlb etmək istəyib. Burada maraqlı bir sual yaranır. 44 günlük müharibədə iştirak edən şəxslər və qazilər Rusiyaya yaxud digər MDB ölkələrinə keçərsə, Ermənistanın tələbi ilə həbs edilə bilər?

Məsələ ilə bağlı, hərbi ekspert Səxavət Məmmədli Sonxeber.az-a açıqamasında bir sıra məqamlara aydınlıq gətirib.

"Ermənistan Daxili İşlər Nazirliyi belə bir informasiya verdi ki, onlar sözügedən şəxs ilə bağlı axtarış veriblər. Amma tam olaraq səbəbi açıqlamadılar ki, nəyə görə baş verib. Ermənistan mediası bildirir ki, guya əllərində video görüntülər var ki, yaşlı bir ermənini öldürüb. Yəni hərbi məsələlər ilə bağlı inanmıram ki, Vətən müharibəsi iştirakçıları Rusiyada həbs edilsin. Azerbaycanın kifayət qədərdi hərbçisi müharibədə iştirak edib. Yəni elə döyüşmüş adamlar var ki, hətta ondan sonra Rusiyada yaşayıblar. Həmin hərbçilərə qarşı hər hansı bir saxlanılma, həbs olunma halı olmayıb. Şəxsən belə bir informasiyanın olduğunu eşitməmişəm. Bu baxımdan düşünmürəm ki, qazilərin, Vətən müharibəsi iştirakçısı Kamil Zeynallı kimi eyni situasiyanı yaşasın. Müharibənin tam içərisində olmuşuq. Bu məsələ hamımıza qaranlıq qalır. Bu cür cinayət işlərinin başladılması üçün faktlar lazımdır. Yəni heç bir əsgər olmuş şəxsin hansısa döyüş zamanı qarşı tərəfin hərbçisini öldürməsi cinayət sayılmır. Bu müharibədir və qaydası budur. Ermənistan tərəfi axtarışı verdiyini deyir, amma niyə bu ərəfədə baş verdiyi bəlli deyil. Amma inanmıram ki, bu hal başqa adamlara problem törədə bilər".

Qeyd edək ki, Ermənistan Respublikası Kamil Zeynallını ölkənin Cinayət Məcəlləsinin 135 (İnsanlığa qarşı cinayətlər), 137 (Müharibə cinayətləri), 140 (Müharibə aparmaq üçün qadağan olunmuş üsullardan istifadə edən hərbi cinayətlər), 147 (Muzdlu cəlb etmək) və 149-cu (Təcavüz) maddələri ilə ittiham edir. Kamil xarici ölkələrdən yalnız Türkiyəyə gedə bilər, başqa ölkələrə səfər etsə, yenidən saxlanıla və ya həbs edilə bilər.

Sevda Səfərova

Telegramda izləyin