Metroda qatarlar niyə GECİKİR? - RƏSMİ AÇIQLAMA

Səhər saatlarında metroda qatarların hərəkərində gecikmə müşahidə olunur. Bunun səbəbi nədir?

Mövzu ilə bağlı "Bakı Metropoliteni" QSC-nin mətbuat xidmətinin rəhbəri Bəxtiyar Məmmədov Sonxeber.az-a açıqlama verib.

O bildirib ki, sərnişin sıxlığının əsas səbəbi tədris müəssisələrinin açılmasıdır:

"Həftənin əvvəlindən Bakı Metropolitenində sərnişin sıxlığı artıb. Bunun əsas səbəbi Bakı Metropolitenində sərnişin daşımada əsas pay sahibi olan tədris müəssisələrinin müəllim, pedoqoq və tələbə heyətidir. Fevralın ilk günləri metroda sərnişin sıxlığı 650 min civarında idisə, hazırda 750 min sərnişin daşıyır. Qatarların hərəkət intervalında dəyişiklik edilməyib. Sərnişin sıxlığı müşahidə olunsa da, hazırda Bakı Metropoliteni maksimal imkanları ilə hərəkət qrafikini qüvvədə saxlayıb.

Günün pik saatlarında Bakı Metropolitenin "28 May" və "Həzi Aslanov" istiqamətlərində interval 2 dəqiqə ilə tənzimlənir. "Dərnəgül" və "İçərişəhər" istiqamətində isə 2 dəqiqəlik intervalı təmin etmək texniki səbəblərdən qeyri-mümkündür. Çünki intervalların azalması üçün xətlərin ayrılması layihəsi həyata keçməlidir".

Bəxtiyar Məmmədov metroda baş verən yubanmaların səbəbinə aydınlıq gətirib:

"Metrolara nəzarət bu həftədən etibarən artırılıb. Ən çox sərnişin olan stansiyalara əlavə işçi qüvvəsi cəlb olunub. Bu əməkdaşlar vətəndaşların hərəkət rahatlığını təmin edirlər. Monitoriqlər daha da çoxalıb. Tekcə qatarların hərəkəti deyil eyni zamanda sərnişin sıxlığı, eləcə də eskalator və digər texniki qurğuların fəaliyyəti nəzarətə götürülüb.

Hazırda Bakı Metropolitenində ciddi yubanmalar yoxdur. Yubanmalar sadəcə bir neçə saniyədir. Bu yubanmalar daha çox sərnişinin sıxlığı olduğu stansiyalarda baş verir. Xüsusi ilə "Koroğlu" və "20 Yanvar" stansiyasında bu halların qarşısını almaq üçün işçi qüvvəsi təyin olunub. Qatarlarda nasazlığı bu həftə ərzində müşahidə olunmayıb. Onu da qeyd edim ki, nasaz qatar olan zaman Bakı Metropoliteni operativ olaraq sərnişinlərə informasiyanı dərhal verir".

Gülcahan Məmmədova

Telegramda izləyin