Cütlüklər ailə qurmazdan əvvəl PSİXOLOJİ MÜAYİNƏDƏN KEÇMƏLİDİRLƏR! - AÇIQLAMA

Azərbaycanda cütlüklər sağlamlıq müayinələri zamanı psixoloji cəhətdən müayinəni nəzərdən qaçırır. Psixoloji vəziyyəti müəyyən edilməyən cütlüklər ailə quran zaman problemlər ilə üzləşir, bu da özlüyündə boşanmalara gətirib çıxarır. Bəs Azərbaycanda fizioloji sağlamlıq müayinələri ilə yanaşı, cütlüklərin məcburi olaraq psixoloji cəhətdən yoxlanılmalıdır?

Məsələ ilə bağlı psixoloq Gülər Məmmədova Sonxeber.az-a deyib ki, Hər bir cütlük sağlamlıq müayinələri və qan analizindən əlavə olaraq, psixoloji müayinədən keçməlidir:

"Psixoloji test böyük əhəmiyyət kəsb etmir. Çünki psixoloji testdə insanlar simulyasiya edə bilir. Onlar orada real cavablar verməyə bilərlər. Ona görə də yaxşı olardı ki, hər bir cütlük pasiyent olaraq psixoloq qəbuluna getsinlər. Onlar psixoloji müayinədən keçərək bir-birlərinin psixoloji durumlarını müəyyən etsinlər. Ola bilsin ki onlar orqanizm cəhətdən tam sağlam ola bilərlər. Yalnız psixoloji aspektdən onlarda uyuşmazlıq ola bilər. Burada söhbət sətri psixoloji durumdan yox, ciddi uyuşmazlıqdan gedir. Çünki bunlar get-gedə ailə qurandan sonra qarşılıqlı münasibətlərin korlanmasına və böhranlı ailəyə qədər gəlib çıxa bilir. Bu baxımdan cütlüklər birmənalı şəkildə psixoloji müayinədən keçməlidirlər".

Psixoloqun sözlərinə görə, hər bir insan psixoloji gigiyenasına fikir verməlidir:

"Amma əfsuslar olsun ki, cütlüklər bunu daha çox nəzərdən qaçırır. Onlar sanki "toyum olsun", "ailə qurum", "ənənəyə sadiq qalım" deyə evlənir. 2-3 aydan sonra korporativ bir tədbir kimi qısa müddətdə ailə münasibətlərini sonlandırırlar. Bununda səbəbi psixoloji cəhətdən uyumsuzluq, ağır nevroloji problemlərin ortaya çıxarılmamasıdır. Eyni zamanda ağır psixi və fizioloji xəstəlikləri belə müəyyən etmədən ailə quranlar sonradan peşmançılıq ilə üzləşir. Təəssüflər olsun ki, bu ya gec olur, ya da ailə natamam olaraq dağılmaq məcburiyyətində qalır. Lakin əvvəldən ölçü götürülsə və müəyyən düzəlişlər edilsə, ömürlük ailəyə çevrilə bilər".

Sevda Səfərova

Telegramda izləyin