Keçmiş kürəkəninin toy xəbərindən sonra xəstəxanaya yerləşdirildiyi deyilən sabiq deputat DANIŞDI - YENİLƏNİB

Keçmiş kürəkəni, Ağstafa Rayon İcra Hakimiyyətinin başçısı Seymur Orucovun ikinci dəfə ailə həyatı qurması xəbərindən sonra xəstəxanaya yerləşdirildiyi deyilən sabiq deputat Şəmsəddin Hacıyev açıqlama verib.

"Qaynarinfo"ya açıqlama verən keçmiş millət vəkili səhhətində problem yaranması barədə xəbəri təkzib edib.

"Hazırda evimdəyəm. Oturub yazılarımı yazıram. Ailəmlə bağlı yayılan məlumatlara münasibət bildirmək istəmirəm. Hər şey əladır və barəmizdə artıq-əskik heç nə yazılmasın", - deyə o qeyd edib.

16:38

İqtisad Universitetinin sabiq rektoru və keçmiş deputat Şəmsəddin Hacıyevin səhhəti pisləşib.

Yenisabah.az-ın əldə etdiyi məlumata görə, onun səhhəti kəskin şəkildə pisləşib və təcili xəstəxanaya yerləşdirilib.

Belə ki, Ağstafa Rayon İcra Hakimiyyətinin başçısı Seymur Orucov bu gün ikinci dəfə ailə həyatı qurur. Məmur uzun müddət ATV və İTV-də fəaliyyət göstərən tanınmış aparıcı Alidə Mustafayeva ilə izdivaca girir.

Seymur Orucovun eks-həyat yoldaşı Çeşmi Hacıyevanın atası, sabiq deputat Şəmsəddin Hacıyev keçmiş kürəkənin ikinci dəfə ailə həyatı qurduğunu eşidəndə dərin sarsıntı keçirib.

Toy xəbəri icra başçısının keçmiş xanımı və onun ailəsi tərəfindən qəzəblə qarşılanıb.

Bu xəbərdən sonra sabiq deputatın hazırda həkim nəzarətində olduğu bildirilir.

Qeyd edək ki, S.Orucovun birinci evlilikdən dörd övladı var.

Telegramda izləyin