"Ermənistan Qazaxın kəndlərini qaytarmaqdan yayınmağa çalışır"- Ekspert

Ermənistan mətbuatında nəşr olunub ki, Paşinyan mətbuat konfransında Tavuş rayonuna bitişik olan kəndləri Azərbaycana qaytarmağa hazır olduğunu təsdiqləyib. Baş nazir bildirir ki, bu kəndlər Ermənistanın suveren ərazisində deyillər, 1990-cı illərdə müharibə nəticəsində nəzarətə götürülüb.

Nəşr qeyd edir ki, hazırda Tavuş istiqamətindəki 7 kəndin 4-nün qaytarılmasından bəhs edilir: "Söhbət Bağanis Ayrım, Qızıl Hacılı, Aşağı Əskipara və Xeyrimli kəndlərindən gedir".

Ermənistan bu kəndləri Azərbaycana qaytarmaqla Qazaxın yeddi kəndini geri qaytarmaqdan boyun qaçıra bilərmi?

Məsələ ilə bağlı politoloq Tural İsmayılov Sonxeber.az-a açıqlama verib.
Ekspert bildirib ki, Ermənistanın Qazaxın 7 kəndini qaytarmaqdan boyun qaçırmaq kimi bir hüququ ola bilməz:

"Ermənistanın Qazaxın 7 kəndini qaytarmaqdan boyun qaçırmaq kimi bir hüququ ola bilməz. Nəzərə almaq lazımdır ki, Qazaxınn Ermənistan tərəfindən işğal edilmiş kəndləri Azərbaycan ərazisidir. Eyni zamanda Azərbaycan qalib tərəf kimi regionda şərtləri diktə edən tərəfdir. Ermənistanın hər hansısa bir məsələdə bizə şərt irəli sürməsi və hansısa arqumentlər qoymaq seçimi ola bilməz.

Bu gün Azərbaycan və Ermənistan arasında münasibətlərin yaxşılaşmasından danışırıqsa, əlbəttə ki bizim işğal altında bir dənə də olsun kəndimiz qalmamalıdır. Ermənistan normal dövlət kimi üzərinə götürdüyü öhdəliklərə əməl etməlidir. Vəziyyətin bu qədər pis hala gəlməsinin səbəbi Ermənistanın özüdür. Ermənistanın apardığı işğalçılıq siyasəti vəziyyəti gərginləşdirir. Qazaxın kəndlərini qaytarmaqdan yayınmağa çalışır. Delimitasiya komissiyalarının iclaslarının gecikməsi və başqa proseslər Ermənistanın yayınma cəhdlərinə görə baş verir. Ermənistan növbəti dəfə dəmir yumruq görmək istəmirsə qeyri-şərtsiz işğal etdiyi kəndləri Azərbaycana geri qaytarmalıdır. Bunun əksini etmək Cənubi Qafqaz üçün yaxşı heçnə vəd etmir, həm də iki ölkənin sülh müqaviləsi imzalamaq perspektivlərini daraldır".

Telegramda izləyin